COP26: Imvo n'Imvano ku nama mpuzamahanga ku ihindagurika ry'ikirere ku isi ibera i Glasgow muri UK

Imvo n'Imvano y'uyu munsi yibanze ku nama mpuzamahanga yateguwe n'umuryango w'abibumbye ku ihindagurika ry'ikirere ku isi ibera i Glasgow mu Bwongereza. Iyo nama y'iminsi 12 yiswe C0P 26 kubera ko ari iya 26 kuva ibihugu byiyemeje gufata ingamba zo kurwanya impamvu zituma ikirere cy'isi gihumana.

Nta kindi gihumanya ikirere cyeretse ibikorwa bya kiremwamuntu. Ikaba ariyo mpamvu gushyira mu bikorwa ibyemejwe muri ayo manama 25 yabanjirije iyi ya COP 26 byabaye ingorabahizi kuko kenshi usanga bibangamiye ibikorwa bya muntu n'iterambere ry'ibihugu. Abahanga baremeza ko ubushyuhe ku isi bukomeje kuzamuka, ibyiza bigakomeza kwiyongera, ikaba ariyo mpamvu muri rusange ibihugu byahagurukiye guhangana n'icyo kibazo. Ntibitangaje rero kuba intumwa ibihumbu 25 ziri i Glasgow mu gihe cy'iminsi 12 kugira ngo zigire hamwe ibyakorwa hakaramirwa ubuzima bw'ikiremwamuntu. Ntibitangaje ko abakuru b'ibihugu bigera kuri 200 bitabiye iminsi 2 ya mbere y'iyo nama ndetse bakahabwa n'imyanya yo kugira icyo bavuga kuri icyo kibazo.

Gusa igitangaje n'uko mbere y'iminsi 2 kugirango inama ya Glasgow itangire, umuryango w'abibumbye wateguye iyindi nama ku cyiciro gikuru cyawo i New York muri Amerika, inama yatumiwemo urubyiruko/ urwaruka rugera kuri 500 rugizwe n'impirimbanyi hamwe n'abakuru b'amashyirahamwe arengera ibidukikije. Iyo nama yatangijwe n'umukobwa w'imyaka 16 - Greta Thunberg ukomoka mu gihugu cya Swede. Greta Thunberg yabaye icyamamare ku isi kuko yatangije umuryango wo kurwanya ihindagurika ry'ikirere, maze atinyuka kwicara imbere y'inteko nshingamateka y'igihugu cye asaba ko igihugu cyafata ibyemezo bikomeye mu kurwanya ihindagurika ry'ikirere.

Kuba abayoboye iyo nama barahisemo ko itangizwa n'umkobwa y'imyaka 16 bifite ishingiro kuko ingaruka z'ihindagurika ry'ikirere zibangiye ikiremwamuntu ubu ariko abo kizagiraho ingaruka cyane mu gihe kiri imbere n'urubyiruko. Akaba ariyo mpamvu ndetse urubyiruko ruhagarariwe muri iyo nama.

Natwe muri Gahuzamiryango, twahisemo ko imvo n'imvano tuyiharira urubyiruko. Twatumiye bamwe mu bari i Glasgow ariko twanahaye ijambo n'abandi kugira ngo batange ibitekerezo byabo.

Mu rubyiruko rwitabiriye inama y'i Glasgow harimo impirimbanyi zavuye mu Rwanda no mu Burundi. Bamwe muribo ni Honorine Isingizwe wo mw'ishyirahamwe Young Volunteers for the Environment rifasha urubyiruko mu gukomeza iterambere ry'imiryango no kubungabunga ibidukikije mu Rwanda.

Abandi turi kumwe ni abatwandikiye ku rubuga rwacu rwa Facebook bifuza kuba muri kino kiganiro.

Iki kiganiro mwagiteguriwe kandi murakigezwaho na Felin Gakwaya