Rwanda: Imvo n'Imvano ku ngaruka z'ihindagurika ry'ikirere ku mutungo kamere w'amazi (isubiwemo)

Mwaramukanye amahoro bakunzi b'ikiganiro Imvo n'Imvano cyo kuri uyu wa gatandatu tariki 30 ukwezi kwa cumi 2021.

Kubera uburemere bw'inama ku ihindagurika ry'ikirere ku isi izatangira ejo mu mujyi wa Glasgow mu Bwongereza, uyu munsi twahisemo kongera kubagezaho ikiganiro cy'ubushize cy'Imvo n'Imvano cyibanze ku ikama cyangwa igabanuka ry'amazi muri bimwe mu biyaga by'u Rwanda.

Biteganyijwe ko abakuru b'ibihugu bazitabira iyo nama, yitiriwe COP26, bazemeza ingamba zo gukumira izamuka ry'ubushyuhe rikomeje kwanduza ikirere ku isi.

Nubwo ibihugu bikennye bifite uruhare ruto mu gusohora imyuka yanduza ikirere, ingaruka z'icyo kibazo zigera muri ibyo bihugu. Imwe mu ngaruka z'icyo kibazo ni ikama ry'amazi mu migezi cyangwa ibiyaga muri Afurika.

Mu Rwanda haravugwa igabanuka ry'amazi mu kiyaga cya Karago, ndetse mu myaka yashize ibiyaga bya Burera na Ruhondo na byo byagize igabanuka rikomeye ry'amazi ryanateye ibura ry'amashanyarazi mu bice byinshi by'igihugu, nubwo ibyo biyaga byaje kongera bigasubirana.

Abahanga bemeza ko imwe mu mpamvu yatumye ayo mazi agabanuka ari ingaruka z'ihinduka ry'ikirere. Muri iyo Imvo n'Imvano, navuganye n'abaturage baturiye ibyo biyaga ndetse mvugana n'abayobozi bansobanuriye ingamba bafashe zo kurwanya icyo kibazo.

Iki kiganiro mwagiteguriwe kandi murakigezwaho na Yves Bucyana.