Rwanda: Batandatu barimo Théoneste Nsengimana wa Umubavu TV bafunzwe – RIB

Urwego rw'ubugenzacyaha mu Rwanda (RIB) ruvuga ko rwafunze abantu batandatu barimo na nyir'isheni Umubavu TV yo kuri YouTube Théoneste Nsengimana, bakurikiranyweho "gutangaza amakuru y'ibihuha agamije guteza imvururu n'imidugararo muri rubanda".

RIB ntiyatangaje amazina y'abandi batanu muri abo bafashwe, ivuga ko bafungiye kuri sitasiyo zayo za Remera na Kicukiro mu mujyi wa Kigali.

Gusa amakuru yemejwe n'ishyaka DALFA-Umurinzi ritaremerwa n'amategeko avuga ko abo bandi ari abayoboke baryo barimo n'abari barihagarariye ku rwego rw'intara.

Victoire Ingabire ukuriye iryo shyaka yabwiye BBC ko yatunguwe n'ifatwa ryabo, avuga ko mu bafashwe harimo abagabo batanu n'umugore umwe bo mu ishyaka rye. Yavuze ko kugeza ubu ataramenya icyo bazize.

Madamu Ingabire ati: "Njyewe ntakubeshya byantunguye kuko nta activités [ibikorwa] zihari, abantu badahura, batagira gute, kugira gutya rero bakavuga ngo bamwe babafashe nibajije byavuye he, byagenze gute.

"Ni bya bindi byuko igihugu cyacu tutari twubaka igihugu kigendera ku mategeko, kugira gutya ugatoragura abantu bo hirya no hino muri opposition [abatavuga rumwe n'ubutegetsi], umuntu aribaza ese bakoze icyaha kimwe bagikorera rimwe? Nta n'umwe wari warigeze ambwira ko hari ikibazo afite cyangwa ko hari abamugendaho…"

Mu butumwa bwo kuri Twitter, RIB isaba "abaturarwanda bakoresha imbuga nkoranyambaga kwirinda kuba umuyoboro w'abashaka guhungabanya umutekano w'igihugu", ivuga ko "abenshi bihishe mu mahanga".

Nta cyo abafunzwe baravuga ku mugaragaro ku byaha bakurikiranyweho.

Amakuru yatangajwe y'"ibihuha" bafatiwe ntiyashyizwe ahagaragara. Ntibyanasobanuwe niba hari isano hagati y'uyu munyamakuru Nsengimana n'aba bayoboke ba DALFA-Umurinzi.

Hari amakuru atandukanye yemeza ko kuri uyu wa kane, shene Umubavu TV yari ifite gahunda yo gutambutsa ikiganiro cyari kwitabirwa n'abiganjemo abatavuga rumwe n'ubutegetsi.

Ngo ni ikiganiro cyagombaga kuvuga ku bantu bafunze kubera kutavuga rumwe n'ubutegetsi ndetse n'abishwe ku mpamvu za politiki.

Gusa RIB ntiyemeje niba hari ihuriro riri hagati y'abafashwe cyangwa se niba iki kiganiro cyaba ari cyo cyatumye umunyamakuru Nsengimana atabwa muri yombi.

Muri raporo yawo yo mu kwezi kwa gatatu, umuryango uharanira uburenganzira bwa muntu Human Rights Watch (HRW) wanenze ubutegetsi bw'u Rwanda kuniga ubwisanzure ku bakoresha imbuga nka YouTube.

HRW yavuze ko mu gihe kingana n'umwaka cyari gishize abategetsi mu Rwanda "bateye ubwoba, bafunze cyangwa bakurikiranye" nibura abantu umunani batangaje ibinenga leta kuri YouTube, ivuga ko ibyo "biteye kwibaza ku mutekano w'abakoresha ubu buryo bushya batanga ibitekerezo" byabo.

Mu kwezi kwa kane mu 2020, umunyamakuru Nsengimana na bwo yari yafunzwe, nyuma aza kurekurwa.