Imvo n'Imvano kuri films zikinirwa mu Burundi

Ndabaramukije nongera ndabaha n'ikaze muri iki kiganiro c'Imvo n'Imvano co kuri uyu wa gatandatu igenekerezo rya 19 ukwezi kwa gatandatu mu 2021.

Muri iki kiganiro turabira hamwe ivyerekeye ama film, abandi bita cinema, akinirwa mu Burundi.

Mu ntango y'uku kwezi, ku ncuro ya 12 ishirahamwe FESTICAB (Festival International du Cinéma et de l'Audiovisuel du Burundi) ryaratunganije ihiganwa ry'ama film mpuzamakungu na kavukire ryamaze imisi umunani.

Filme zose zahiganywe zari 54, hakaba haranatanzwe n'ubushimwe butandukanye. Icibonekeje n'uko, n'aho hakiri ibibazo vyinshi, hariho ishaka ku barundi benshi na cane cane ku rwaruka ryo guhurumbira kwandika no gukina ama filime.

Abasanzwe bakina amafilime barishize hamwe bagira n'ishirahamwe bahurikiyemwo bise COPRODAC (Collectif des Professionnels pour le Développement de l'Audiovisuel et du Cinéma).

Cinema y'umurundi yamenyekanye cane no ku rwego mpuzamakungu ni Gito, yaronse ubushimwe bwinshi cane butandukanye no mu bihugu bitandukanye, ikaba yanditswe na Léonce Ngabo, isohoka mu 1992.

Ubu Léonce Ngabo ariko arahumura, ariko hari abasore n'inkumi bashaka kumukorera mu ngata. Bazobishobora? Habura iki kugira Uburundi buje ku rwego rw'ibindi bihugu dusangiye akarere mu vyerekeye amafilime? Hokorwa iki kugira abakinyi b'amafilme bashike kure? Igihugu cohungukira iki?

Ivyo ni vyo bibazo tugiye guca hirya no hino muri kino kiganiro.

Muri kino kiganiro rero twari kuba hamwe na Batungwanayo Richard ajejwe igisata c'akaranga mu bushikiranganji bujejwe imigenderanire y'akarere ka Afrika y'ubuseruko (EAC), ariko ntiyitavye.

Turi kumwe na Léonce Ngabo yashinze akaba ari na we anarongoye ishirahamwe FESTICAB, akaba ari umwanditsi n'umukinyi wa filime.

Diane Kaneza arongoye ishirahamwe COPRODAC, akaba yananonosoye ivyigwa bijanye na cinema, akaba mbere ari na we yatahukanye agashimwe ka mbere k'ihiganwa rya mbere rya FESTICAB.

Hanyuma kandi turi kumwe n'umwigeme Fanny Faxine Uwimana aheruka kuronka agashimwe k'umukinyi mwiza muri filime yiwe yise Urugendo.

Muri studio za BBC i Nairobi mukaba mugiye kuba hamwe na Cyriaque Muhawenayo.