Malawi - Impunzi: Urukiko rwahagaritse ingingo yo kuzisubiza mu nkambi

Urukiko muri Malawi ku wa gatatu rwafashe icyemezo cyo kuba ruhagaritse ingingo yo gusubiza mu nkambi impunzi zaba mu mijyi, ariko leta ivuga ko nyinshi muri zo zari zimaze kugenda.

Ku wa kabiri w'iki cyumweru twabagejejeho inkuru y'icyemezo cya leta ya Malawi yari yahaye impunzi z'Abanyarwanda, Abarundi n'Abanyekongo, umunsi wo ku wa gatatu kuba zasubiye mu nkambi bitaba ibyo hagakoreshwa ingufu.

Ubu guverinoma iravuga ko yabaye ihagaritse gukoresha ingufu mu gusaba kwimuka abantu barenga 1.000 baba hanze y'inkambi y'impunzi, nyuma y'icyemezo cy'urukiko cy'agateganyo.

Ariko minisitiri ushinzwe umutekano w'igihugu yabwiye BBC Gahuzamiryango ko benshi mu mpunzi zirebwa n'iki cyemezo, ingingo y'urukiko yasohotse bamaze gusubira mu nkambi.

Richard Chimwendo ni Ministiri w'umutekano muri Malawi, yavuganye na Prudent Nsengiyumva, amubaza aho icyemezo cyaturutse. (Umva aho hejuru ikiganiro bagiranye)