Rwanda: Imvo n'Imvano ku igabanuka rya 60% ry'imfashanyo ku mpunzi zikomoka mu Burundi na DR Congo

Ndabashuhuje mwebwe mwese nshuti muteze amatwi BBC, ni umwanya w'ikiganiro Imvo n'Imvano, turi ku wa gatandatu tariki ya 24 y'ukwezi kwa kane umwaka wa 2021.

Ikiganiro cyacu uyu munsi kiribanda ku kibazo cy'igabanuka ry'imfashanyo y'ibiribwa yahabwaga impunzi z'Abarundi n'iz'Abanye-Congo ziri mu Rwanda.

U Rwanda rucumbikiye impunzi zisaga ibihumbi 100 ziri mu nkambi zitandukanye hirya no hino mu gihugu.

Mu kwezi kwa gatatu uyu mwaka ni bwo ishami ry'umuryango w'abibumbye ryita ku biribwa ku isi (PAM/WFP) ryatangiye gushyira mu bikorwa icyemezo cyo kugabanya ku kigero cya 60% imfashanyo y'amafaranga yagenerwaga impunzi.

Mbere, buri umwe wese yahabwaga 7600FRW ku kwezi. Kuri ubu, impunzi zirahabwa amafaranga 3040 ku kwezi. Bisobanuye ko ku munsi buri muntu agomba gutungwa n'amafaranga y'u Rwanda 110.

BBC yasuye impunzi z'Abarundi zicumbikiwe mu nkambi ya Mahama mu burasirazuba bw'u Rwanda. Twasuye kandi impunzi z'Abanye-Congo ziri mu nkambi ya Gihembe mu karere ka Gicumbi mu majyaruguru y'u Rwanda n'iziri mu nkambi ya Kigeme mu majyepfo y'u Rwanda.

Uretse ikibazo cy'inzara, zimwe muri izi mpunzi kandi zivuga ko zitishimiye kwimurirwa mu nkambi ya Mahama, zigasaba gusubizwa muri Congo. Ese zirimurwa ku zihe mpamvu?

Muri izo nkambi zose ariko, twavuganye n'impunzi twasanze hanze y'inkambi kuko tutemerewe kwinjira imbere mu nkambi.

Minisiteri ishinzwe ibibazo by'impunzi mu Rwanda yo ivuga ko ishishikariza impunzi kubaho mu buryo bwo "kwigira" nk'uko abenegihugu babayeho. Ni mu gihe ishami ry'umuryango w'abibumbye ryita ku biribwa ku isi rivuga ko riri gushakisha izindi nkunga kugira ngo ikibazo cy'inzara mu nkambi z'impunzi gicyemuke.

Ni ikiganiro mwateguriwe kandi mugiye kugezwaho na Yves Bucyana.