LeBron v Zlatan: Ni nde watsinze mu guterana amagambo kuri politike?

LeBron James, umukinnyi wa basketball w'igihangange wo muri Amerika, yateranye amagambo na Zlatan Ibrahimovic, umukinnyi w'igihangange mu mupira w'amaguru ukomoka muri Sweden (Suède), nyuma yuko uyu amusabye kutajya muri politike.

Mu kiganiro cyo kuri televiziyo, Ibrahimovic yavuze ko abakinnyi nka James badakwiye kuyijyamo kuko "bitagaragara neza".

James yasubije ati: "Nta na rimwe nzaceceka ku bintu bitari byo".

Akomoza ku byo Ibrahimovic yigeze kwinubira mu gihe cyashize bijyanye n'irondaruhu muri Sweden, James yagize ati: "Urebye mu by'ukuri ndi nk'umuntu wayobeyeho...Nkora akazi nshinzwe".

Aba bakinnyi ni ibyamamare bikomeye buri umwe mu mukino we.

Ibrahimovic, mu kiganiro na UEFA and Discovery+ muri Sweden, yanenze ibyamamare mu mikino bijya mu kuba impirimbanyi muri politike.

Yagize ati: "Kora icyo ushoboye gukora neza. Kora mu cyiciro ukoramo. Nkina umupira w'amaguru kuko ndi intyoza mu gukina umupira w'amaguru, ntabwo ndi umunyapolitike. Iyo nza kuba ndi umunyapolitike, nari kuba ndimo gukora politike".

"Iri ni ryo kosa rya mbere abantu b'ibyamamare bakora iyo bamaze kwamamara bakagera ku rwego runaka. Kuri jye ni ingenzi kwirinda ingingo zimwe na zimwe [ahubwo] ugakora icyo ushoboye gukora neza cyane kurusha ibindi, kubera ko iyo bitabaye gutyo ntabwo bigaragara neza".

Igisubizo cya James nyuma yuko ikipe ye ya LA Lakers itsinze Portland Trail Blazers ku wa gatanu nijoro, nta guca ku ruhande kwari kukirimo.

Yagize ati: "Nta na rimwe naceceka ku bintu bitari byo".

Ati: "Ntanga ubutumwa ku bantu banjye kandi ntanga ubutumwa buvuga ku busumbane, akarengane mu mibereho, irondaruhu, uburyo bugenderewe bwo kuburizamo amajwi y'abatora, ibintu biba aho dutuye".

"Nta kuntu naguma na rimwe ku mikino gusa, kuko nsobanukiwe n'ukuntu uru rubuga n'ijwi ryanjye bifite imbaraga".

James kandi yagaragaye nk'ufite urujijo ku byavuzwe na Ibrahimovic, kuko uyu mukinnyi w'icyamamare mu mupira w'amaguru yagiye mu buryo buhoraho avuga yamagana irondaruhu.

James yagize ati: "Ni umuntu wavuze muri Sweden, yari arimo avuga kuri ibi bintu nyirizina, kubera ko izina rye ryo mu muryango ritari [irimenyerewe muri Sweden] izina ryo mu muryango, yumvaga hari irondaruhu runaka ririmo kuba ari mu kibuga".

Ibrahimovic koko mu mwaka wa 2018 yabwiye igitangazamakuru Canal+ cyo mu Bufaransa ko adafatwa cyo kimwe n'abandi bakinnyi bo muri Sweden, agira ati: "Ibi bijyanye n'irondaruhu. Ntabwo mvuga ko hari irondaruhu, ariko ndavuga ko hari irondaruhu ryihishe".

No mu kiganiro na BBC mu kwezi kwa cumi na kabiri mu mwaka ushize, nabwo yamaganye irondaruhu.

Ariko yanagize umwanya wo kwisobanura, by'umwihariko nyuma yuko hari ibyo yabwiye umukinnyi Romelu Lukaku wa Inter Milan ubwo bashyamiranaga mu mukino w'amahari (derby) wo mu kwezi kwa mbere n'ikipe ye ya AC Milan.

Ku ruhande rwe, James yanenzwe mbere ku kuba impirimbanyi muri politike.

Yashyamiranye n'uwari Perezida w'Amerika Donald Trump ku gikorwa cyo gupfukama mu kwamagana irondaruhu ryashinze imizi mu muryango mugari w'Amerika.

Umunyamakuru Laura Ingraham wa televiziyo Fox News yamusabye "guceceka [ahubwo] agacenga mu kibuga".

Igereranya...

Zlatan Ibrahimovic w'imyaka 39, wahoze akinira ikipe y'igihugu ya Sweden, yakinnye mu cyiciro cya mbere mu bihugu birindwi, mu mwuga wo gukina umupira w'amaguru yatangiye mu myaka irenga 20 ishize.

Yegukanye ibikombe birenga 30, atsinda ibitego birenga 500 nk'umukinnyi wabigize umwuga, kandi ku myaka 39 aracyakataje muri shampiyona zo mu cyiciro cya mbere - ubu yasubiye muri AC Milan.

Mbere yaho yakinaga muri Galaxy i Los Angeles - umujyi James atuyemo muri iki gihe.

LeBron James w'imyaka 36, ahanini afatwa nk'umwe mu bakinnyi bakomeye cyane babayeho mu mateka ya shampiyona ya NBA.

Yegukanye igikombe cya NBA akina mu makipe atatu atandukanye - Cleveland Cavaliers, Miami Heat na Los Angeles Lakers - kandi ku mikino ya nyuma muri ayo makipe yose yagiye aba umukinnyi w'intyoza kurusha abandi (MVP).