Imvo n'Imvano ku irahira rya perezida mushya wa Leta Zunze Ubumwe za Amerika, Joe Biden

Imvo n'Imvano yo kuri uyu wa gatandatu tariki ya 30 z'ukwa mbere 2021, iragaruka ku irahira rya perezida mushya wa Leta Zunze Ubumwe za Amerika.

Ku itariki ya 20 z'ukwezi kwa Mbere, Joseph Robinette Biden Jr., uzwi nka Joe Biden, yarahiriye kuba perezida wa 46 wa Amerika. Mu muhango utarangwamo rubanda bitandukanye n'indi yabanje kubera icyorezo cya coronavirusi, Biden yasezeranyije Abanyamerika guhashya iyi virusi imaze koreka ubuzima bw'abantu barenga ibihumbi 400 muri Amerika honyine.

Ubutegetsi bwa Biden ariko ntabwo buhanganye na covid19 gusa. Hari ibibazo karande bishingiye ku ivangura ry'uruhu. Ubushakashatsi bwakozwe na kaminuza ya Havard muri 2020 bwagaragaje ko umwirabura afite ibyago byo kwicwa arashwe na polisi ku nshuro zikubye gatatu n'ibice 23 ugereranyinye n'umuzungu. Urupfu rw'umwirabura George Floyd ku itariki ya 20 z'ukwa gatanu 2020 wapfiriye mu maboko ya polisi, ku muhora w'umuhanda mu mujyi wa Minneapolis, rwashenguye Amerika n'isi rusembura ibibazo bifite ubukana bw'ivanguraruhu bitarabonerwa umuti urambye mu gihugu gituwe n'abantu barenga miliyoni 300 bafite inkomoko cyangwa imizi mu ruhuri rw'amoko atandukanye ku isi.

Ubukene bunuma n'ibura ry'akazi byatewe na Covid19, ni ikindi kibazo cy'ingutu cyazahaje ubukungu bwa Amerika Biden agomba kubonera igisubizo mu myaka ine ya manda ye iri imbere.

N'ubwo Biden yatsinze amatora, ariko uwo bari bahanganye, Donald Trump, yatowe n'Abanyamerika barenga miliyoni 75. Benshi muri bo ntibarava ku izima ngo bayoboke perezida mushya. Bwana Trump ubwe, yavuye ku butegetsi ku itariki 20 z'ukwa mbere ataremera ku mugaragaro ko yatsinzwe amatora.

Inteko ishinga amategeko ifite ubwiganze bw'abo mu ishyaka ry'aba Demokarate yatoye imukuraho icyizere mbere y'uko ava ku butegetsi ku mugaragaro mu kizwi nka impeachment.

Abadepite bamushinja gukongeza umwuka w'ibikorwa by'urugomo byakorewe mu nzu iyi nteko ikoreramo ku itariki ya 6 z'ukwa Mbere, igihe abadepite n'abasenateri bari mu muhango wari uyobowe n'uwahoze ari visi perezida Mike Pence uteganywa n'itegekonshinga wo kwemeza itorwa rya Biden ku buryo ntakuka.

Bwana Trump yakoze amateka mabi yo kuba perezida wa mbere ukuweho icyizere n'inteko ishinga amategeko inshuro ebyiri.

N'ubwo atakiri ku butegetsi, ariko haracyari umurage w'ibyemezo bya politike yashyize mu bikorwa mu myaka ine.

Biden wamusimbuye afite umugambi wo gusibanganya byinshi muri ibi byemezo. Azabigeraho se?

Mu irahira rye yasezeranyije kuba umuperezida w'Abanyamerika bose. Abamutoye n'abataramutoye. Azabishobora se, mu gihugu kirimo amacakubiri ashingiye kuri politike ku rugero rutaragaragara mu bihe bya vuba? Ese ku rwego mpuzamahanga isi yamwitegaho iki?

Ibyo, ni bimwe mu bibazo dusesengura muri ino mvo n'imvano y'uyu munsi.

Abatumire bacu ni Dr Omar Halfani umushakashatsi akaba n'impuguke mu bya politike. Na Dr Sentamba Elias, umwarimu mu ishami ry'ibijyanye n'amasomo ya politike muri kaminuza y'Uburundi.

Iki kiganiro mwagiteguriwe kandi murakigezwaho na Prudent Nsengiyumva.