Coronavirus: 'Miss Rwanda' mu banini, wayikize ni we wari urembye kurusha abandi

Vivine Uwizeye uzwi cyane ejo kuwa gatatu yavuye kwa muganga nyuma yo gupimwa inshuro enye mu byumweru bibiri ngo hemezwe neza ko yakize coronavirus nk'uko abivuga.

Uyu ni umuntu wanduye coronavirus mu Rwanda wamenyakana bikavugwa cyane ku mbuga nkoranyambaga.

Yabwiye BBC ko ari we wahamagaye abashinzwe ubuzima ubwo yari amaze iminsi afite bimwe mu bimenyetso bya Covid-19 birimo inkorora n'umutwe kugira ngo bamusuzume.

Avuga ko bamusanze iwe mu rugo tariki 16/04/2020 bagafata ibipimo, bakamubwira ko ibisubozi abibona hagati y'amasaha 24 na 48.

Ati: "Bavuye mu rugo uwo munsi nimugoroba naje kuremba ntangira kubura umwuka, nibwo baje kunjyana kwa muganga CHUK banshyira ku mwuka, bareba ko wenda naba mfite izindi ndwara ariko ntibazibona".

Umunsi wakurikiyeho nibwo yamenyeshejwe ko basanze yaranduye coronavirus. Avuga ko yari inkuru iteye ubwoba.

Minisiteri y'ubuzima ivuga ko kugeza ejo kuwa gatatu mu Rwanda hamaze kuboneka abantu 287 banduye coronavirus, muri bo 164 bamaze kuyikira ntawe irica.

Mu minsi irindwi ishize habonetse abantu 19 bashya banduye Covid-19, iyi minisiteri ivuga ko muri bo batatu(3) ari bo bayanduriye imbere mu gihugu, abandi biganjemo abashoferi b'amakamyo yambukiranya imipaka.

Tariki 18/04/2020 Madamu Uwizeye, umubyeyi w'abana babiri, yajyanywe ku ivuriro rya Kanyinya riri hanze gato y'umujyi wa Kigali, aho bakurikirana abrwaye coronavirus mu Rwanda.

Icyo gihe minisiteri y'ubuzima yatangaje ko ari we murwayi bafite urembye, Viviane Uwizeye nawe yabwiye BBC ko koko muri iryo vuriro icyo gihe ariwe murwayi wari urembye.

Ati: "Nitaweho cyane, bakoresheje imbaraga zishoboka bampa imiti ishoboka itsinda ry'abaganga ryarazaga rikareba icyo rigomba kunkorera. Ni njyewe wari urembye kuri urwo rwego".

Madamu Uwizeye yabwiye BBC ko mu 2011 yatowe nka Miss Rwanda mu marushanwa y'abagore n'abakobwa babyibushye.

Nta yandi marushanwa araba nk'ayo bityo avuga ko akiri Miss Rwanda muri iki kiciro.

Nubwo ari munini nta ndwara zikunze kugendana n'umubyibuho kwa muganga bamusanzemo nk'uko abivuga, yemeza ko biri mu byafashije umubiri we gusohora iyi virus mu mubiri.

Avuga ko abaganga bavura ibimenyetso by'iyi ndwara umubiri nawo ukarwana n'iyi virus, maze bitewe n'ubwirinzi bwawo ukabasha kuyitsinda.

Ku kigo yavurirwagaho i Kanyinya, avuga ko abarwayi bahura n'abaganga b'indwara zo mu mutwe babafasha kutagira ihungabana kubera ibyo bari kumva ko iki cyorezo kiri kwica abantu benshi.

Serivisi zose abariyo bahabwa avuga ko nta kiguzi baca umurwayi , akavuga ko abona ko leta yabyiteguye neza.

Ibyumweru bibiri nyuma yo gukira

Mu ntangiriro z'uku kwezi nibwo ibipimo bya mbere byagaragaje ko yakize iyi ndwara. Ati: "Icyo gihe uba winjiye mu kindi kiciro cyo gupima neza ko wakize.

Madamu Uwizeye avuga ko kuva icyo gihe kugeza ejo tariki 13/05/2020 asezererwa mu bitaro yasuzumwe inshuro enye (4) kugira ngo bemeze neza ko yakize.

Uwizeye avuga kuri Covid-19 ati: "Utayivuje kare yaguhitana, ariko nanone nkurikije uko nari ndembye mpamya ko uwagera kwa muganga wese hakiri kare yahava yakize".

Uwizeye avuga ko iyi ndwara igoranye mu rwego rw'uburyo yandura kuko atazi neza uko yayanduye, gusa akeka ko yayanduye akoze ahantu iyi virus iri nawe akiyanduza.

Avuga ko nubwo yayikize, kwa mugana bamubwiye ko akomeza akirinda ko yakongera kuyandura.

Miss Vivy nk'uko bakunze kumwita, avuga ko mu babana nawe mu rugo harimo abanduye Covid-19 bakiri kuvurwa kandi yizeye ko nabo bazakira.