Coronavirus: Angela Merkel avuga ko 70% by'abaturage b'Ubudage bashobora kuyandura

Umukuru w'Ubudage Angela Merkel yaburiye ko abaturage bagera kuri 70% by'abatuye icyo gihugu - ni ukuvuga abagera kuri miliyoni 58 - bashobora kwandura coronavirus.

Madamu Merkel yatangaje iryo teganya riteye impungenge ubwo yari mu kiganiro n'abanyamakuru kuri uyu wa gatatu, ari kumwe na Minisitiri w'ubuzima Jens Spahn.

Yavuze ko kubera ko nta muti uzwi uriho wa coronavirus kugeza ubu, igikwiye kwibandwaho ari ukugabanya umuvuduko w'ubwandu bw'iyi virusi. Ati: "Ni ugusiganwa n'igihe".

Madamu Merkel avuze ayo magambo mu gihe Ubutaliyani bwinjiye mu munsi wa kabiri w'ubuzima busa n'ubwahagaze muri iki gihugu.

Giuseppe Conte, Minisitiri w'intebe w'Ubutaliyani, yatangaje ifungwa ry'amashuri, ahakorerwa imyitozo ngororangingo, inzu ndangamurage, iz'imyidagaduro n'ahandi hasanzwe hahurira abantu benshi muri icyo gihugu.

Kuri uyu wa gatatu, umubare w'abanduye coronavirus mu Butaliyani warenze 10,000.

Ubushinwa - aho iyo virusi yagaragaye bwa mbere - ubu bufite abantu 80,754 bemejwe ko bayanduye naho abandi 3,136 yarabishe. Ariko ejo ku wa kabiri bwageze ku munsi w'abanduye bashya bacye cyane - 19 gusa.

Umurwayi wa gatatu yapfuye mu Budage

Kuri uyu wa gatatu, Ubudage bwemeje umuntu wa gatatu wapfuye bivuye kuri coronavirus.

Uwa mbere yishe mu Budage ni umugore w'imyaka 89 y'amavuko wapfiriye mu mujyi wa Essen, uwa kabiri yishe ni umugabo w'imyaka 78 wari usanzwe afite ubundi burwayi wapfiriye i Heinsberg.

Kugeza ubu, Ubudage bumaze gutangaza abantu 1,296 barwaye coronavirus, nkuko bikubiye mu mibare y'ejo ku wa kabiri y'ikigo Robert Koch Institute (RKI) cyo kurwanya indwara cyo mu Budage.

Lothar Wieler, umukuru w'ikigo RKI, yavuze ko icyo kigo kitibwira ko haba hari umubare munini w'abataratahurwa bayirwaye bo muri icyo gihugu.

Ubwo yavugaga ari kumwe na Bwana Wieler muri icyo kiganiro n'abanyamakuru - ari bwo bwa mbere yari agize icyo atangaza mu ruhame kuri coronavirus, Madamu Merkel yaburiye ko gufunga imipaka bishobora kuba bidahagije mu kwirinda iyo virusi.

Yabyamaganye nyuma yaho igihugu cya Austria (cyangwa Autriche) gifatiye iya mbere mu guheza abagisura bavuye mu Butaliyani.

Yagize ati: "Iki ni ikizamini ku bufatanye bwacu, ku gushyira mu gaciro kwacu no ku kwita kuri buri muntu. Kandi nizeye ko tuzatsinda icyo kizamini".

Madamu Merkel yanavuze ko ashobora gukuraho gahunda ya leta yo kudafata umwenda izwi nka "black zero", mu gufasha ko leta yaguza amafaranga yandi bibaye ngombwa.

Yavuze ko ubu igihugu kiri "mu bihe bidasanzwe" kandi ko guhagarika coronavirus ari byo biza mbere y'ibindi byose.

Kuri uyu wa gatatu kandi, abategetsi b'umurwa mukuru Berlin baciye ibikorwa bihuza abantu barenga 1,000 kugeza ikiruhuko cya Pasika kirangiye.

Dilek Kalayci, ukuriye urwego rw'ubuzima muri uwo mujyi, yagize ati: "Coronavirus ikomeje gukwirakwira. Muri iki cyiciro, guterana kw'abantu bigomba kugabanywa".

Madamu Kalayci yongeyeho ati: "Gukwirakwira kwa coronavirus gushobora kugabanyirizwa umuvuduko hagabanywa ibikorwa bikomeye bihuza abantu. Iyo icyorezo kigitangira, igabanywa nk'iryo riba ari ingenzi".