Burundi: Umugore wari umuyobozi mu ishyaka CNL yishwe 'mu buryo buteye isoni'

Marie Claire Niyongere, umuyobozi wungirije w'ishami ry'abagore bo mu ishyaka CNL ritavuga rumwe n'ubutegetsi mu Burundi muri Komine Kiganda Intara ya Muramvya, biravugwa ko yishwe nyuma yo gufatwa ku ngufu.

Umuvugizi w'ishyaka CNL yavuze ko bagishakisha amakuru arambuye yo kumenya uko uyu Madamu Niyongere yishwe n'abamwishe.

Hari amakuru yemeza ko umuntu umwe yafashwe agafungwa akekwaho uruhare mu kwica Madamu Niyongere. Umuvugizi wa polisi mu Burundi ntiyasubije BBC kuri iki kibazo.

Terence Manirambona, umuvugizi w'ishyaka CNL, yabwiye BBC ati: "Ico gusa tuzi ni uko yaritavye Imana mu buryo mwese mwumvise buteye isoni, amaziko ye azaba ejo ku wa gatanu".

Bwana Manirambona avuga ko bataremeza niba iyicwa rye hari aho rihuriye n'ishyaka yari arimo kuko bakibaza "ido n'ido" ku byabaye mu bashinzwe umutekano n'abayobozi ba CNL muri ako gace.

Umuyobozi wa komine Kiganda Celine Ndabubaha yabwiye BBC ko umurambo wa Niyongere basanze ufite ibikomere ku ijosi no ku gitsina nk'uko byemejwe n'umuganga.

Madamu Ndabubaha Yemeza ko hari umuntu umwe ukekwa kugeza ubu.

Uyu muyobozi avuga ko Madamu Niyongere asize abana bane.

Mu kwezi kwa munani Nsavyumwami Gregoire wari uwo mu ishyaka CNL yarishwe bagenzi be barakomereka mu gico batezwe n'abantu bafite imipanga n'amahiri. Abakekwa bamwe bari kuburanishwa.