Guhera none impunzi z'Abarundi i Nyarugusu hari ibyo zitemerewe

Umuyobozi mukuru w'inkambi y'impunzi z'Abarundi ya Nyarugusu avuga ko guhera uyu munsi hari ibyo zibujijwe gukora.

Itangazo yasohoye ku munsi w'ejo ku wa gatanu, rivuga ko bibujijwe ku mpunzi cyangwa undi muntu uwo ari wese gukora ubucuruzi bw'inzu zo gucumbikiramo abagenzi zizwi nka 'guest houses'.

Rivuga kandi ko bitemewe gukora ubucuruzi bw'akabari cyangwa aho abantu bajya kwicira inyota. Ryongeraho ko gukora ubunyonzi, cyangwa kunguruza abantu ku igare (ikinga, mu Kirundi) bitemewe mu nkambi.

Iryo tangazo rinavuga ko nyuma y'iyi tariki ya kabiri y'ukwa cumi na kumwe, "isaka rikomeye rizakorwa, uwo bizagaragara ko yabirenzeho afatirwe ibihano bikomeye biteganywa n'amategeko".

Ariko iri tangazo ry'ubuyobozi bukuru bw'inkambi ya Nyarugusu rivuga ko amagare azakomeza gukoreshwa "ku munsi wo gufata imfashanyo no mu kujyana abarwayi ku bitaro gusa".

Nta bisobanuro birenzeho ubuyobozi bukuru bw'inkambi bwatanze ku mpamvu zatumye ibyo byemezo bifatwa.

Umwe mu mpunzi z'Abarundi uba mu nkambi ya Nduta na yo yo muri Tanzania utifuje gutangazwa izina, avuga ko no muri iyo nkambi hari guhwihwiswa ko hagiye gufungwa za 'restaurants'.

Ati: "Tubibona ko ari rya himiriza ribandanya ryo guhungurwa ngo twishore ku icumu".

Mu kwezi gushize kwa cumi, leta ya Tanzania yavuze ko yisubiyeho ku cyemezo cyo gucyura ku ngufu impunzi z'Abarundi cyagombaga gutangira gushyirwa mu bikorwa ku itariki ya mbere y'ukwo kwezi.

Muri iki cyumweru, HCR yasabye leta ya Tanzania "kureka ibikorwa byo kotsa igututu impunzi ngo zitahe".

Inkambi ya Nyarugusu mu burengerazuba bwa Tanzania ibarirwamo impunzi z'Abarundi zigera ku 58,000, nkuko bitangazwa n'ishami ry'umuryango w'abibumbye ryita ku mpunzi (HCR).