Intambara ya kabiri y'isi: Perezida w'Ubudage yasabye imbabazi Pologne kubera 'ubugome' bw'Aba-Nazi

Inyandiko gusa
Perezida Frank-Walter Steinmeier w'Ubudage (uri ibumoso) yasabye igihugu cya Pologne imbabazi kubera intambara ya kabiri y'isi

Ahavuye isanamu, Reuters

Insiguro y'isanamu, Perezida Frank-Walter Steinmeier w'Ubudage (uri ibumoso) yasabye igihugu cya Pologne imbabazi kubera intambara ya kabiri y'isi

Perezida Frank-Walter Steinmeier w'Ubudage yasabye igihugu cya Pologne imbabazi kubera "ubutegetsi bw'ubugome" bw'Aba-Nazi, mu gihe uyu munsi imyaka 80 ishize intambara ya kabiri y'isi itangiye.

Bwana Steinmeier n'abandi bategetsi bavuye mu bice bitandukanye by'isi, bateraniye muri Pologne mu kwibuka itangira ry'iyo ntambara.

Ku itariki nk'iyi mu mwaka wa 1939, Umudage Adolf Hitler yateye Pologne mu burengerazuba, hashize iminsi ibiri Ubufaransa n'Ubwongereza bishoza intambara ku Budage, intambara ya kabiri y'isi iba irambikanye.

Mbere yaho kuri iki cyumweru, hakozwe umuhango wo kwibuka mu mujyi wa Wielun w'aha muri Pologne, aho ibisasu bya mbere by'Ubudage byamishwe.

Bwana Steinmeier yamaganye "ubushake bwo gutsembatsemba" bwabaye intandaro y'icyo gitero.

Avuga mu Kidage n'Ikinya-Pologne, yagize ati: "Nunamishije umutwe wanjye imbere y'inzirakarengane zo muri Pologne zazize ubutegetsi bw'ubugome bw'Ubudage. Kandi nsabye imbabazi".

Bwana Steinmeier na Bwana Duda bacana za buji ku rwibutso rw'ahamishwe ibisasu n'Ubudage mu ntangiriro y'intambara ya kabiri y'isi

Ahavuye isanamu, EPA

Insiguro y'isanamu, Bwana Steinmeier na Bwana Duda bacana za buji ku rwibutso rw'ahamishwe ibisasu n'Ubudage mu ntangiriro y'intambara ya kabiri y'isi

Bwana Steinmeier yavuze iryo jambo ari iruhande rwa mugenzi we wa Pologne, Andrzej Duda, wamaganye igitero Ubudage bwo mu gihe cy'ubutegetsi bw'Aba-Nazi bwagabye kuri Pologne nk'"igikorwa cya kinyamaswa".

Muri uyu muhango, watangiye nyuma gato ya saa kumi za mu gitondo ku isaha yo muri Pologne, hafashwe igihe cy'umunota cyo kuzirikana abiciwe muri iyo ntambara.

Skip Ibisomwa cane and continue reading
Ibisomwa cane

End of Ibisomwa cane

Bwana Duda yagize ati: "[Umujyi wa] Wielun yari gutanga ishusho ry'uko intambara izagenda, ko izaba intambara simusiga, intambara idakurikiza itegeko na rimwe, intambara kirimbuzi".

Ku mugoroba wo kuri iki cyumweru, biteganyijwe ko abandi bategetsi bavuye mu bice bitandukanye by'isi, barimo umutegetsi mukuru w'Ubudage Angela Merkel na Visi-Perezida w'Amerika Mike Pence, baza guteranira mu muhango uri bubere mu murwa mukuru Warsaw (Varsovie) wa Pologne.

Abantu bacanye za buji mu mujyi wa Wielun wabaye uwa mbere umishijweho ibisasu n'Ubudage, bibuka itangira ry'intambara ya kabiri y'isi

Ahavuye isanamu, EPA

Insiguro y'isanamu, Abantu bacanye za buji mu mujyi wa Wielun wabaye uwa mbere umishijweho ibisasu n'Ubudage, bibuka itangira ry'intambara ya kabiri y'isi

Pologne ni kimwe mu bihugu byashegeshwe bikomeye n'intambara ya kabiri y'isi: abaturage bayo hafi miliyoni esheshatu barishwe.

Imyaka 80 nyuma yaho, Pologne iracyasaba impozamarira Ubudage kubera impfu n'isenywa yatejwe nabwo.

Ifoto igaragaza ibisigazwa by'umurwa mukuru Warsaw (Varsovie) nyuma yo kumishwaho ibisasu n'Ubudage bw'Aba-Nazi mu ntambara ya kabiri y'isi

Ahavuye isanamu, Getty Images

Insiguro y'isanamu, Ifoto igaragaza ibisigazwa by'umurwa mukuru Warsaw (Varsovie) nyuma yo kumishwaho ibisasu n'Ubudage bw'Aba-Nazi mu ntambara ya kabiri y'isi

Ibikorwa byo mu bihe bya vuba bishize bya Minisitiri w'intebe wa Pologne Mateusz Morawiecki - ishyaka rye rya Law and Justice (PiS) rishinjwa gukabiriza urukundo rw'igihugu - byo gusaba impozamarira Ubudage, byateje umwuka mubi hagati y'ibihugu byombi.

Akanama ko mu Nteko Ishinga Amategeko ya Pologne karacyiga ku ngano y'iyo mpozamarira, ariko Ubudage bwo buvuga ko ibyabaye byarangiye.