Kompanyi z’indege mu Bushinwa zirasaba Boeing indishyi

Inyandiko gusa
Indege yo mu bwoko bwa Boeing 737 Max 8 ya kompanyi Air China

Ahavuye isanamu, Getty Images

Insiguro y'isanamu, Indege yo mu bwoko bwa Boeing 737 Max 8 ya kompanyi Air China

Kompanyi eshatu nini zo gutwara abantu mu ndege zo mu Bushinwa ziri gusaba indishyi kompanyi ikora indege ya Boeing kubera indege zayo zo mu bwoko bwa 737 Max ubu zahagaritswe.

Nkuko bitangazwa n'igitangazamakuru cya leta y'Ubushinwa, Air China, China Southern na China Eastern zamaze gutanga ibirego bisaba indishyi.

Abategetsi mu Bushinwa ni bo bategetse izi kompanyi guhagarika kugurutsa bene izi ndege nyuma y'impanuka ebyiri zikomeye z'izi ndege zikorwa na Boeing y'Abanyamerika.

Izo kompanyi zo mu Bushinwa ubu zirasaba Boeing indishyi kubera igihombo zivuga ko zatewe no guhagarikwa kw'izi ndege ndetse no gukerererwa kwabayeho kw'ingendo zari gukora.

Ubushinwa ni cyo gihugu gikoresha indege nyinshi za 737 Max. Ni nacyo cyabaye icya mbere mu kuzihagarika nyuma y'impanuka y'indege nk'iyi ya Ethiopian Airlines mu kwezi kwa gatatu.

Iyi mpanuka yahitanye abantu 157 bari bayirimo bose.

Mu kwezi kwa cumi umwaka ushize, abantu 189 na bo bapfiriye mu mpanuka ya bene iyi ndege ya kompanyi ya Lion Air ya Indonesia.

Indege yo mu bwoko bwa Boeing 737 Max ya kompanyi China Southern yafotorewe ku ruganda rwa Boeing rwa Renton i Washington, muri uyu mwaka wa 2019

Ahavuye isanamu, Getty Images

Insiguro y'isanamu, Indege yo mu bwoko bwa Boeing 737 Max ya kompanyi China Southern yafotorewe ku ruganda rwa Boeing rwa Renton i Washington, muri uyu mwaka wa 2019

Kuva haba impanuka ya kompanyi ya Ethiopian Airlines mu kwezi kwa gatatu uyu mwaka, indege zose za Boeing 737Max kompanyi zazikoreshaga zahagaritse kongera kuzikoresha.

Skip Ibisomwa cane and continue reading
Ibisomwa cane

End of Ibisomwa cane

Izi mpanuka zombi Boeing yemeje ko zatewe n'ikibazo mu buryo bushya bwa 737 Max bwo kuyirinda impanuka buyibuza guhagarara mu mfuruka ihanamye cyane.

Mu cyumweru gishize, Boeing yatangaje ko yamaze gukemura iki kibazo. Iyi kompanyi ubu iri ku gitutu cyo kugaragaza ko 737 Max ubu ari nta makemwa zishobora kongera gufata ikirere.

Gusaba indishyi kwa kompanyi zo mu Bushinwa bije mu gihe kuri uyu wa kane muri leta ya Texas muri Amerika hateganyijwe inama mpuzamahanga y'ibigo bigenzura iby'indege.

Ntabwo biramenyekana neza niba ziriya ndege za 737 Max zizemererwa gusubira mu kirere mbere yuko iki gihe cy'impeshyi - aho abantu bagenda cyane ku isi - kirangira.