Aung Suu Kyi, umutegetsi wa Myanmar, ashyigikiye igihano cyahawe abanyamakuru ba Reuters

Inyandiko gusa
Madamu Suu Kyi yigeze gufatwa nk'ikimenyetso cy'uburenganzira bwa muntu

Ahavuye isanamu, EPA

Insiguro y'isanamu, Madamu Suu Kyi yigeze gufatwa nk'ikimenyetso cy'uburenganzira bwa muntu

Aung Suu Kyi, umutegetsi wa Myanmar, yashyigikiye ifungwa ry'abanyamakuru babiri b'ibiro ntaramakuru Reuters nubwo ryamaganwe n'amahanga.

Yavuze ko Wa Lone na Kyaw Soe Oo - bombi ba kavukire b'iki gihugu - bishe amategeko kandi ko igihano bahawe "ntaho gihuriye na busa n'ubwisanzure bw'itangazamakuru."

Bombi bakatiwe igifungo cy'imyaka irindwi kubera gusanganwa impapuro za polisi mu gihe bakoraga inkuru-perereza ku bwicanyi bwakorewe ba nyamucye b'abayisilamu bo mu bwoko bw'aba-Rohingya.

Madamu Suu Kyi w'imyaka 73 y'amavuko wigeze gutsindira igihembo cy'amahoro cya Nobeli, yanavuze ko leta ye hari ikindi gitandukanye yashoboraga kuba yarakoze ku kibazo cy'aba-Rohingya.

Kuva mu mwaka ushize wa 2017, aba-Rohingya bagera ku bihumbi 700 bahunze Myanmar - izwi nanone nka Burma - nyuma yaho igisirikare gitangiye ibikorwa by'urugomo mu rwego rwo gusubiza ibitero by'umutwe w'inyeshyamba w'aba-Rohingya.

Umuryango w'abibumbye wasabye ko abasirikare bakuru b'iki gihugu bakorwaho iperereza ku byaha bya jenoside - ibyaha abategetsi ba Myanmar bahakana.

Muri iki cyumweru, ishami rya ONU ry'uburenganzira bwa muntu ryashinje iki gihugu gutangira "ibikorwa byibasira abanyamakuru" ndetse n'igihano cyahawe abo banyamakuru cyaranenzwe n'amahanga, harimo na Visi-Perezida Mike Pence wa Leta Zunze Ubumwe z'Amerika.

Hari hashize igihe Madamu Suu Kyi - utari perezida watowe wa Myanmar nubwo bwose hafi ya hose ku isi ariko afatwa - ari ku gitutu cyo kugira icyo atangaza ku bwicanyi bwakorewe aba-Rohingya ndetse no ku gihano cyahawe abo banyamakuru.

Skip Ibisomwa cane and continue reading
Ibisomwa cane

End of Ibisomwa cane

Abanyamakuru Kyaw Soe Oo (ibumoso) na Wa Lone ubwo bari bashorewe na polisi nyuma yo gukatirwa n'urukiko rwo muri Myanmar ku itariki ya 3 y'uku kwezi kwa cyenda

Ahavuye isanamu, Getty Images

Insiguro y'isanamu, Abanyamakuru Kyaw Soe Oo (ibumoso) na Wa Lone ubwo bari bashorewe na polisi nyuma yo gukatirwa n'urukiko rwo muri Myanmar ku itariki ya 3 y'uku kwezi kwa cyenda

Kuri uyu wa kane ni bwo yagize icyo abivugaho, ubwo yari abibajijwe mu nama mpuzamahanga y'ubukungu ibera muri Vietnam. Yavuze ko igihano cyahawe abanyamakuru ba Reuters cyubahirije amategeko.

Yabaye nk'ukuvuga ko benshi banenga icyo gihano batasomye umwanzuro w'urukiko.

Yagize ati:

"Ntabwo bafunzwe kubera ko ari abanyamakuru, bafunzwe kubera ko...urukiko rwafashe icyemezo ko bishe amategeko ajyanye n'amabanga y'igihugu."

Yongeyeho ko abo banyamakuru bombi bafite "uburenganzira bwose bwo kujuririra umwanzuro w'urukiko bakagaragaza aho barenganyijwe."