Ikibazo cy'abimukira mu Burayi: Abaminisitiri bari buhure mu gihe Ubutaliyani bushaka gufunga ibyambu
Ahavuye isanamu, Getty Images
Abaminisitiri b'ubutegetsi bw'igihugu mu Budage, Ubufaransa n'Ubutaliyani barahurira i Paris mu kuganira ku kibazo cy'abimukira nyuma y'uko Ubutaliyani butanze impuruza ko inkundura y'abimukira itakwihanganirwa.
Ubutaliyani bwatanze impuruza ko izafunga ibyambu byabwo ndetse bukanafata ubwato butabara abimukira bukoreshwa n'imiryango y'ubutabazi izana abimukira ibakuye mu mazi ari ku cyambu cya Libiya.
Uburinzi bw'inkombe z'i Roma bukora ihuzabikorwa ry'ubutabazi ariko guverinoma y'Ubutaliyani ivuga ko ibindi bihugu by'Uburayi byagombye kurekera ubwato ku nkombe bikanakira bamwe mu bimukira.
Guverinoma irasaba ibi nyuma y'uko abimukira 12.000 bagereye mu gihugu mu gihe cy'iminsi ibiri gusa mu cyumweru gishize.
Kuva mu mwaka wa 2014, abimukira barenga miliyoni bambutse banyuze ku byambu by'Ubutaliyani.
Ahavuye isanamu, EPA
Ku wa Gatatu, Ubutaliyani bwavuze ko buzahagarika ubwato bw'ibindi bihugu buzana abimukira ku nkombe zabwo.
Umwe mu bategetsi mu Butaliyani yavuze ko "Ubutaliyani bwarengewe" mu gihe Minisitiri w'INtebe Paolo Gentiloni ashinja ibindi bihugu by'Uburayi "kwirengagiza ikibazo."
Libiya ni inzira ikoreshwa n'abimukira bava muri Afurika banyuze mu butayu bwa Sahara ndetse n'abava mu mwigimbakirwa w'Abarabu, mu Misiri, Siriya na Bangladesh. Benshi bahunga intambara, ubukene ndetse n'itotezwa.
