Coronavirus: Urukundo rusesuye kuri uyu mukecuru n’umusaza no muri iki gihe cya Covid-19
Ahavuye isanamu, DPA
Umukecuru n'umusaza bahindutse ibyamamare kubera ukuntu bahurira ku mupaka buri munsi, muri iki gihe isi ihanganye n'icyorezo cya coronavirus.
Umukecuru Ingan Rasmussen w'imyaka 85 wo muri Denmark n'umusaza Karsten Tüchsen Hansen w'imyaka 89, bahurira hafi y'umujyi wa Aventoft wo mu Budage, buri munsi.
Bakaganira bakanasangira icyo kunywa, ari nako bubahiriza intera ya metero imwe hagati yabo, yagenwe n'inzego z'ubuzima.
Hashize ibyumweru bibiri umupaka ugabanya Ubudage na Denmark ufunzwe, mu kwirinda ikwirakwira rya coronavirus.
Iyi ni indwara imerera nabi kandi yica benshi mu bari mu zabukuru kurusha abakiri bato, ibi byatumye henshi ku isi bashishikarizwa kuguma mu ngo zabo no kwirinda cyane.
- CORONAVIRUS: Yavuye he, ifata ite, yakwirindwa gute?
- IBINDI BIBAZO WIBAZA KURI IKI CYOREZO: Ibi ni bimwe mu bisubizo
- UMUBIRI UYIRWANYA GUTE: Abahanga bamenye uko bigenda
- DUSABWA KWIRINDA KWIKORA MU MASO: Twabigenza dute?
- WABA URI MU RUBYIRUKO? OMS ivuga ko utakwirara
- KWISHYIRA MU KATO: Ni ryari? Bikorwa gute? Bitanga iki?
Ubudage bufite abarwayi bagera ku 63,000 bemejwe ko banduye iyo virusi, naho Denmark yo ifite abarenga 2,500.
Akarere k'u Burayi ka Schengen - gatuma abatuye mu bihugu bikagize batembera nta nkomyi bava mu gihugu kimwe bajya mu kindi - ariko ubu siko bikimeze.
Mu bihugu bimwe byo muri ako karere ka Schengen, ibyo ni bwo bwa mbere bibaye mu myaka 25 ishize. Bavaga mu gihugu kimwe bajya mu kindi nkaho ari igihugu kimwe.
Ariko uyu mukecuru n'umusaza ntibazareka iki cyorezo cyugarije isi ngo kibabuze guhura.
Umukecuru Rasmussen yabwiye igitangazamakuru cya rubanda cyo mu Budage, Deutsche Welle, ati:
"Birababaje, ariko ntidushobora kubihindura".
Bombi bamaze kumenyekana cyane muri ako gace muri iki gihe cy'icyorezo cya coronavirus.
Ni nyuma yaho umuyobozi w'akarere ko mu mujyi waho wa Tonder, muri Denmark, ahabasanze ubwo yari ari kunyonga igare.
Uwo mukecuru n'umusaza bamenyanye mu myaka ibiri ishize, ndetse bamaze umwaka urenga baba bari kumwe hafi buri munsi.
Umukecuru Rasmussen atwara imodoka ye akava mu mujyi atuyemo wa Gallehus, mu gihe umusaza Hansen we anyonga igare rye akava mu mujyi wa Süderlügum.
Iyo bahuye, rimwe na rimwe uwo musaza yinywera ikirahure kimwe cy'inzoga ya 'schnapps'.
Umukecuru Rasmussen we buri gihe anywa ikawa gusa.
Yabwiye ikinyamakuru Der Nordschleswiger cyo muri Denmark ati:
"Cyane ko mba ngomba gutwara imodoka".
Rasmussen n'umusaza Hansen bagiye batemberana mu bihe byashize, ndetse bafite gahunda yo kongera gutemberana iki cyorezo cya coronavirus nikirangira.
Ni bamwe mu bakundana batahuye uburyo bushya bwo gukomeza umubano wabo muri iki cyorezo.
