دو مرزبان تاجیک در مرز افغانستان کشته شدند
منبع تصویر، Getty Images
در پی کشته شدن دو مرزبان تاجیک در درگیری با افراد مسلح در مرز با افغانستان، نیروهای مرزبانی تاجیکستان خواستار «عذرخواهی از مردم تاجیکستان» و اتخاذ تدابیر اضافی مؤثر برای تضمین امنیت در مرز افغانستان با تاجیکستان از سوی حکومت طالبان شده است.
نیروهای مرزبانی کمیته دولتی امنیت ملی تاجیکستان، حکومت طالبان در افغانستان را به متهم کردهاند که در اجرای تعهدات بینالمللی و وعده خود در جهت تضمین امنیت و ثبات در مرز دولتی با تاجیکستان و مبارزه با اعضای سازمانهای تروریستی «قصور جدی و بیمسئولیتی» نشان میدهد.
این نیروها اعلام کردند که دو مرزبان تاجیک در جریان درگیری با اعضای یک «سازمان تروریستی» در مرز این کشور با افغانستان کشته شدند.
از این افراد به نامهای دگرمن زیربان نوروزبیکف و جگرن عصمتالله قربانف نام برده شده است.
این حادثه شب پنجشنبه (۴ جدی/ ۲۵ دسامبر) در محدوده پاسگاه مرزی سرچشمه، در ناحیه شمسالدین شاهین، در جنوب تاجیکستان رخ داد.
نیروهای مرزبانی تاجیکستان، در بیانیه خود اعلام کرده که برای حفظ امنیت در مرز توان نیرویی و نظامی دارد و به گروههای تروریستی، قاچاقبران مواد مخدر و تلاشهای آنان برای عبور غیرقانونی از افغانستان به تاجیکستان پاسخ قاطع خواهد داد.
حکومت طالبان تاکنون به ادعای مطرح شده از سوی تاجیکستان واکنشی نشان نداده است.
به نوشته «خاور»، خبرگزاری رسمی تاجیکستان، مرزبانان پس از مشخص کردن محل استقرار «تروریستها» که یک شب پیش از افغانستان وارد خاک تاجیکستان شده بودند، از آنان خواستهاند تسلیم شوند، اما آنان از این دستور مرزبانان تاجیک سرپیچی کردند.
دفتر مطبوعاتی نیروهای مرزبانی تاجیکستان، نهادی وابسته به کمیته دولتی امنیت ملی این کشور گفته است که در جریان عملیات جنگی هر سه «تروریست» کشته شدند.
در بیانیه این نهاد آمده است که ۳ قبضه تفنگ خودکار ام-۱۶، یک قبضه تفنگ کلاشینکوف، سه تپانچه یا سلاح دستی، ۱۰ نارنجک دستی، یک دوربین دوچشمی شبانه، مواد منفجره و دیگر مهمات جنگی از محل درگیری ضبط و مصادره شده است.
مقامهای تاجیک درباره هویت سه جنگجو اطلاعاتی ندادهاند.
منبع تصویر، Tajik border troops
این سومین بار در یک ماه اخیر است که از خاک افغانستان به تاجیکستان حمله میشود.
اواخر ماه گذشته میلادی در پی حمله از خاک افغانستان به نواحی مرزی شمسالدین شاهین و درواز تاجیکستان، پنج معدنکار و راهساز چینی کشته و پنج شهروند دیگر چین و تاجیکستان زخمی شدند.
وزارت خارجه حکومت طالبان، در آن زمان این حملات را کار «حلقاتی که برای ایجاد آشوب، بیثباتی و بیاعتمادی میان کشورها در منطقه تلاش میکنند» خواند.
امیر خان متقی، وزیرخارجه حکومت طالبان اوایل ماه جاری میلادی در گفتوگوی تلفونی با سراج الدین مهرالدین، وزیران امور خارجه تاجیکستان از «آمادگی کامل» حکومت طالبان برای «تقویت امنیت مرزی، تحقیقات مشترک و هرگونه هماهنگی است و و اقدامات مشترک علیه عناصر شرور» خبر داد.
تاجیکستان، حکومت طالبان را به رسمیت نمیشناسد، اما دو طرف دیدارها و رفتوآمدهای سیاسی داشتهاند.
ماه گذشته هیئتی از مقامهای این کشور از کابل دیدار کرد.
در حال حاضر سفارت افغانستان در دوشنبه را سفیر حکومت پیشین اداره میکند.
شماری از رهبران «جبهه مقاومت ملی افغانستان» هم بعد از سقوط حکومت جمهوری به تاجیکستان رفتند.
همچنین در گذشته مقامات تاجیکستان در مخالفت با حکومت طالبان اظهارنظر کردهاند.
