امیرخان متقی: حکومت طالبان آماده تحقیقات مشترک و تقویت امنیت مرزی با تاجیکستان است

وزارت خارجه حکومت طالبان از گفت‌وگوی تلفونی امیر خان متقی و سراج الدین مهرالدین، وزیران امور خارجه طالبان و تاجیکستان پس از دو حمله مرگبار به شهروندان چین در مزر تاجیکستان با فغانستان در روزهای اخیر خبر داده است.

در بیانیه این وزارت آمده است که دو طرف در مورد روابط سیاسی، همکاری‌های اقتصادی، وضعیت مرزی، هماهنگی امنیتی و ابتکارات منطقه‌ای بین دو کشور، صحبت کردند.

در روزهای گذشته در دو حمله جداگانه از خاک افغانستان پنج شهروند چین در منطقه مرزی افغانستان و تاجیکستان کشته‌ شدند.

آقای متقی در گفت‌وگو با همتای تاجیکستانی خود حملات در مناطق مرزی دو کشور را محکوم و بر اهمیت همکاری مشترک برای ثبات منطقه‌ای تأکید کرده است.

او افزود که حکومت طالبان «کاملاً آماده تقویت امنیت مرزی، تحقیقات مشترک و هرگونه هماهنگی است و و اقدامات مشترک علیه عناصر شرور را نیاز فوری می‌داند.»

وزیر خارجه حکومت طالبان همچنین به بهبود روابط دوجانبه در عرصه‌های سیاسی، اقتصادی و امنیتی اشاره کرده و افزوده است که «برخی حلقات در تلاش‌اند تا به این روند مثبت آسیب رسانند.»

آقای متقی به طور مشخص از این حلقات نام نبرده است.

در بیانیه وزارت خارجه حکومت طالبان آمده است که سراج‌الدین مهرالدین، وزیر خارجه تاجیکستان نیز با اشاره به پیوندهای تاریخی، فرهنگی و دینی دو کشور، از هماهنگی‌های مرزی میان دوطرف حمایت کرده است.

او افزده که تاجیکستان طرفدار تعامل مثبت با حکومت افغانستان است.

کشته شدن کارگران چینی در مرز افغانستان و تاجیکستان

در یک هفته گذشته ولایت همرز بدخشان با افغانستان شاهد حملات خونین بر شهروندان چین بوده است.

شب چهارشنبه هفته گذشته (۵ قوس) در حمله‌ای که گفته شد با استفاده از پهپاد مسلح به نارنجک از خاک افغانستان انجام شد، سه کارگر چینی در ولایت ختلان تاجیکستان کشته شدند و یک نفر دیگر زخمی شد. بعد از آن سفارت چین در دوشنبه، از اتباع این کشور خواست که از این منطقه مرزی خارج شوند.

این حادثه در «منطقهٔ شمس‌الدین شاهین در ولایت ختلان تاجیکستان» روی داد.

حکومت طالبان هم تلویحا حمله از خاک افغانستان را تأیید کرد و از طرف مشخص به عنوان عامل حمله نام نبرد، اما گفته بود که بر اساس ارزیابی‌ها و اطلاعات ابتدایی نهادهای مربوطه، «در این رویداد آن دسته از حلقاتی دست دارند که برای ایجاد آشوب، بی‌ثباتی و بی‌اعتمادی میان کشورها در منطقه تلاش می‌کنند.»

حمله دوم هم در قلمرو ولایت خودمختار کوهستان بدخشان تاجیکستان به تاریخ (۹ قوس) رخ داد که جان دو کارگر جاده‌ساز چینی را گرفت.

ساکنان محل گفتند که این حمله شامگاه یکشنبه در محدوده روستای شادک، از شورای روستای ویشخرو ناحیه درواز رخ داده است.

درواز تاجیکستان با ولسوالی درواز پایین (مایمی) ولایت بدخشان افغانستان هم‌مرز است و آن را «دروازه»‌ ولایت بدخشان تاجیکستان می‌دانند.

افراد کشته شده از کارگران شرکت جاده‌سازی چینی بودند که مشغول بازسازی جادۀ دوشنبه–کولاب–درواز–خاروغ–مُرغاب–کُلمَه است و این جاده تاجیکستان را به چین متصل می‌کند.

حمله در زمانی انجام شد که در روزهای گذشته محمد اسماعیل غزنوی، والی بدخشان به تاجیکستان سفر کرده بود.

معاون نظامی ریاست عمومی پولیس سرحدی حکومت طالبان نیز او را در این سفر همراهی می‌کرد.

به گفته عابدالله عقاب فاروقی، سخگوی ریاست عمومی پولیس سرحدی حکومت طالبان، این هیئت با والی کوهستان خودمختار بدخشان تاجیکستان، معاون امنیت ملی سرحدات و دیگر مقامات امنیتی تاجیکستان دیدار و درباره تقویت نظم بنادر و هماهنگی مرزی گفت‌وگو کرد.

تاجیکستان حکومت طالبان را به رسمیت نمی‌شناسد، اما دو طرف دیدارها و رفت‌وآمدهای سیاسی داشته‌اند.

حدود دوهفته پیش هیئتی از مقام‌های این کشور از کابل دیدار کرد.

در حال حاضر سفارت افغانستان در دوشنبه را سفیر حکومت پیشین اداره می‌کند، اما اداره جنرال‌قنسولی افغانستان در خاروغ به عهده مقام منصوب‌شده از سوی حکومت طالبان است.

شماری از رهبران «جبهه مقاومت ملی افغانستان» هم بعد از سقوط حکومت جمهوری به تاجیکستان رفتند.

همچنین در گذشته مقامات تاجیکستان در مخالفت با حکومت طالبان اظهارنظر کرده‌اند.