هیئت بلندپایه تاجیکستان برای گفتوگو با مقامهای حکومت طالبان وارد کابل شد
منبع تصویر، AFP via Getty Images
منبعی در حکومت طالبان به بیبیسی تأیید کرده است که امروز (شنبه ۲۴ عقرب) یک هیئت بلندپایه از تاجیکستان وارد کابل شده است. نمایندگانی از وزارتهای خارجه و امنیت تاجیکستان در ترکیب این هیئت حضور دارند.
به گفته این منبع، هدف سفر این هیئت به افغانستان «توسعه و تقویت روابط سیاسی، اقتصادی و امنیتی» میان دو کشور است. مقامهای تاجیکستان در دوشنبه تاکنون در این باره اظهار نظری نکردهاند.
تاجیکستان حکومت طالبان را به رسمیت نمیشناسد، اما دیدارها و رفتوآمدهای سیاسی میان دو طرف همچنان ادامه دارد.
این هیئت که جزئیات ترکیب آن هنوز بهصورت رسمی اعلام نشده، قرار است در جریان دیدار از کابل با شماری از مقامهای حکومت طالبان دیدار کند.
خبرگزاری باختر زیر اداره حکومت طالبان گزارش داده است که قرار است این هیئت درباره پروژههای مشترک و همکاریهای منطقهای نیز گفتوگو کند.
همچنین یک منبع به بیبیسی گفته است که موضوع فعالیت سفارت افغانستان در دوشنبه نیز از محورهای گفتوگو خواهد بود.
در حال حاضر سفارت افغانستان در دوشنبه توسط سفیر حکومت پیشین اداره میشود، اما اداره جنرالقنسولی افغانستان در خاروغ به عهده مقام منصوبشده از سوی حکومت طالبان است.
گفته میشود تاجیکستان میزبان برخی از اعضای ارشد مخالفان طالبان، از جمله «جبهه مقاومت ملی»، نیز است.
پیش از این نیز گزارشهایی درباره سفر هیئتهای تاجیکستان به افغانستان و همچنین سفر نمایندگان حکومت طالبان به تاجیکستان منتشر شده بود.
تاجیکستان همواره نسبت به تهدیدهای ناشی از حضور «گروههای تروریستی» در افغانستان ابراز نگرانی کرده و به گفته کارشناسان، انتظار میرود نمایندگان این کشور در دیدارهای امروز از مقامهای حکومت طالبان بخواهند اقدامات جدیتری در زمینه مبارزه با تروریزم و باندهای قاچاق مواد مخدر، بهویژه در مرزهای شمالی، انجام دهد.
تاجیکستان از همسایگان شمالی افغانستان است و دو کشور بیش از ۱۴۰۰ کیلومتر مرز مشترک دارند. از آغاز به قدرت رسیدن طالبان، تاجیکستان بارها بر ضرورت ایجاد حکومت فراگیر در افغانستان تأکید کرده است.
افغانستان پس از پاکستان طولانیترین مرز را با تاجیکستان دارد. ولایتهای بدخشان، تخار و قندز در شمالشرق افغانستان با ولایات ختلان و بدخشان خودمختار تاجیکستان هممرز هستند و بیشتر خط مرزی دو کشور را رودخانههای آمو و پنج تشکیل میدهند.
پیشتر، شورای امنیت ملل متحد در ۱۴ فبروری سال جاری گزارش داده بود که نیروهای طالبان پاکستان و جمعیت انصارالله تاجیکستان (طالبان تاجیکستان) در افغانستان اردوگاههای آموزشی ایجاد کردهاند که زیر نظر شبکه القاعده فعالیت میکنند.
اما ذبیحالله مجاهد، سخنگوی حکومت طالبان، این گزارش را رد کرده و آن را «بیاساس و تبلیغات برخی حلقات» خوانده بود.
پیشتر، رستم امامعلی، رئیس پارلمان تاجیکستان نیز هشدار داده بود که خطر گسترش «ایدئولوژی مخرب افراطگرایی مذهبی» از افغانستان به کشورهای آسیای میانه در حال افزایش است.
با این حال، در سالهای اخیر بازارچههای مرزی تاجیکستان و افغانستان که پس از روی کار آمدن طالبان بسته شده بودند، دوباره بازگشایی و فعال شدهاند. همچنین به دستور امامعلی رحمان، رئیسجمهور تاجیکستان، اخیراً یک کاروان بزرگ کمکهای بشردوستانه برای زلزلهزدگان افغانستان ارسال شده است.
