Y Ceidwadwyr Cymreig yw'r cyntaf o'r pleidiau gwleidyddol i lansio eu maniffesto ar gyfer Etholiad Senedd 2026
Ymhlith yr addewidion mae torri ceiniog oddi ar gyfradd sylfaenol treth incwm ac adeiladu ffordd liniaru'r M4, rhoi cap ar y cynnydd mewn treth cyngor a gofyn am refferendwm lleol ar gynnydd dros 5%
Addewid hefyd i gael gwared ar dreth stamp Cymru
Gwaharddiad dros dro ar ffermydd gwynt a solar mawr
Ailsefydlu Asiantaeth Datblygu Cymru hefyd yn addewid i ddenu buddsoddiad mewnol, hyrwyddo twf busnesau a chreu swyddi
a gostyngiad o £1,000 ar ffioedd dysgu wedi'i addo i fyfyrwyr sy'n astudio pynciau gwyddoniaeth, technoleg, peirianneg neu fathemateg
BBC Cymru Fyw
A dyna ni mae'r blaid gyntaf yng Nghymru - y Ceidwadwyr - wedi cyhoeddi eu maniffesto ar gyfer Etholiad y Senedd 2026.
Yn ystod y diwrnodau a'r wythnosau nesaf bydd y pleidiau eraill yng Nghymru yn cyhoeddi eu haddewidion - a bydd y manylion ar ein llif byw.
Diolch am eich cwmni heddiw - mae prif straeon y dydd ar wefan Cymru Fyw.
Hwyl am y tro.
Elliw Gwawr
Gohebydd Gwleidyddol BBC Cymru
Ffynhonnell y llun, Athena PicturesDarren Millar yn cyhoeddi'r maniffesto
Mae yna lot o bolisïau yma fydd yn boblogaidd gyda’r cyhoedd.
O dorri treth incwm a threth trafodiadau tir i ymestyn gofal plant, bysiau am ddim i bobl ifanc a mwy o gymorth ariannol i fusnesau a help i fyfyrwyr gyda ffioedd dysgu.
Mae Darren Millar yn dweud bod hwn wedi'i brisio - yn ddifrifol ac yn gredadwy. Ond maen nhw’n gwario arian fel petai ganddyn nhw bocedi diddiwedd.
I mi dyw hwn ddim yn teimlo fel dogfen ar gyfer llywodraethu - yn hytrach yn rhestr o ddymuniadau ar gyfer trafodaethau clymblaid posib wedi’r etholiad.
Ffynhonnell y llun, Athena PicturesY gynulleidfa yn cymeradwyo wedi i'r lansiad ddod i ben
Bydd Cymru'n pleidleisio ar 7 Mai 2026 i ethol 96 o wleidyddion i Senedd fydd â mwy o aelodau. Mae'r BBC yn rhoi cyfle i chi awgrymu straeon yr hoffech i Newyddion BBC Cymru fwrw golwg arnyn nhw cyn yr etholiad.
Beth sy'n wirioneddol bwysig i chi? Pa bwnc a fydd yn dylanwadu ar eich pleidlais? Pa ddigwyddiadau yn eich bywyd y mae angen i wleidyddion posib wybod amdanynt?
Bydd Dy Lais yn rhoi lle canolog i'ch straeon a'ch cwestiynau yn ein darllediadau etholiadol.
Cliciwch y botwm isod i gyflwyno'ch syniad, a gallai gael ei gynnwys ar raglen deledu, radio, gwasanaethau ar-lein y BBC, BBC Sounds ac ar gyfryngau cymdeithasol.
Rhys Owen
Gohebydd gwleidyddol Golwg
Yn ystod ei araith fe wnaeth Darren Millar ailadrodd ei neges sef mai ei unig nod yw cael cynifer o aelodau Ceidwadol i mewn i’r Senedd nesaf ag sy’n bosib.
Ychwanegodd nad oedd ganddo “diddordeb mewn trafod” gyda phleidiau eraill, er yn syth wedyn dywedodd ei fod fwy neu lai’n sicr y bydd angen rhyw fath o gydweithio, oherwydd system newydd etholiadol gyfrannol D’Hondt.
Ffynhonnell y llun, Getty ImagesDoedd Darren Millar ddim am gadarnhau na diystyru'r posibilrwydd o weithio gyda phleidiau eraill yn dilyn yr etholiad
Cafodd y map newydd ei lunio gan Gomisiwn Democratiaeth a Ffiniau Cymru.
Oherwydd diffyg amser cyn yr etholiad nesaf, cafodd y comisiwn gyfarwyddyd i ddefnyddio'r 32 etholaeth a gafodd eu defnyddio yn yr etholiad cyffredinol i San Steffan y llynedd fel sail i'w gwaith.
Aeth y comisiwn ati wedyn i baru'r etholaethau hynny er mwyn creu 16 etholaeth newydd.
Roedd yn rhaid i'r comisiwn gyplu etholaethau oedd yn "cydgyffwrdd", ac fe benderfynodd y comisiwn bod hyn yn golygu bod yn rhaid cael cysylltiad ffordd uniongyrchol rhyngddynt.
Bydd y comisiwn yn gallu edrych eto ar y map yn dilyn yr etholiad, ac ystyried newidiadau ar gyfer etholiad 2030.
Ffynhonnell y llun, Senedd CymruEr mwyn gallu pleidlieisio mae'n rhaid i chi:
Ffynhonnell y llun, Getty ImagesRhys Owen
Gohebydd gwleidyddol Golwg
Mae addewidion mawr gan y Ceidwadwyr ar gyfer addysg uwch, £1,000 yn llai mewn ffioedd dysgu i bobl sy'n astudio cyrsiau STEM.
Hefyd, mae Darren Millar yn ymrwymo i ad-dalu myfyrwyr sy’n graddio mewn meddygaeth, nyrsio neu ddeintyddiaeth, ar yr amod eu bod yn gweithio yn y Gwasanaeth Iechyd yng Nghymru am o leiaf bum mlynedd.
Mae Darren Millar yn dweud wrth fyfyrwyr “os ydych yn ymrwymo i Gymru, mi fyddwn ni’n ymrwymo i chi”.
Ond i blaid 'nath dreblu’r ffioedd i fyfyrwyr yn Lloegr, tybed a fydd pobl ifanc Cymru yn credu’r Ceidwadwyr Cymreig?
Ffynhonnell y llun, Getty ImagesDyma argraffiadau gohebydd gwleidyddol y BBC, Elliw Gwawr, wedi i'r Ceidwadwyr Cymreig lansio eu maniffesto ym Mae Caerdydd.
Owain Clarke
Gohebydd iechyd BBC Cymru
Cafodd nifer o gynigion etholiadol iechyd y Ceidwadwyr yng Nghymru eu datgelu cyn cyhoeddi'r maniffesto cyflawn.
Un o'r penawdau yw y byddai'r blaid, o gael ei hethol yn datgan "argyfwng iechyd" cenedlaethol.
Mae hyn yn dilyn camau tebyg gan ddau gyngor yn y gogledd - Sir Ddinbych a Chonwy - i ymateb i'r hyn maen nhw'n ystyried yn ffaeleddau'r gwasanaeth iechyd yn lleol.
Ond mae'n aneglur i mi beth fyddai datgan "argyfwng iechyd" yn ei olygu yn ymarferol.
Mae'r blaid hefyd yn addo ymateb "fel yn ystod Covid" i drwsio'r gwasanaeth iechyd - ond y gwir yw bod nifer o'r heriau presennol e.e. rhestrau aros hir wedi tyfu'n aruthrol o ganlyniad i'r ymateb yn ystod y pandemig - pryd cafodd miloedd o driniaethau eu gohirio i flaenoriaethu gofal brys.
Mae undebau sy'n cynrychioli meddygon a nyrsys wedi rhoi croeso gofalus i'r cynllun allai weld gweithwyr ychwanegol - fel staff sydd wedi ymddeol - ar gael i fyrddau iechyd "pan fo'r galw ar ei uchaf".
Byddai nifer hefyd yn cytuno fod angen i'r gwasanaeth iechyd wneud mwy i fanteisio ar botensial technoleg fel Deallusrwydd Artiffisial (AI) lle bo hynny'n ddiogel.
Ond pan gafodd yr addewid i ystyried cyflwyno dirwyon i bobl am fethu apwyntiadau meddygol ei gynnig gan y blaid rai blynyddoedd yn ôl - fe gafodd y syniad ei feirniadu gan grwpiau sy’n cynrychioli meddygon teulu.
Eu dadl nhw oedd y byddai dirwyon o'r fath yn targedu'r cleifion mwyaf bregus.
Ffynhonnell y llun, Getty ImagesRhys Owen
Gohebydd gwleidyddol Golwg
Fe wnaeth Darren Millar agor ei araith drwy ddisgrifio Kemi Badenoch fel “ased gwleidyddol a fydd y Prif Weinidog nesaf”.
Er y cyffro yn ei lais, mae unrhyw obaith i Kemi Badenoch ennill yr etholiad cyffredinol nesaf yn ddibynnol ar ddymchwel cefnogaeth i Reform UK.
Bydd y canlyniad yng Nghymru ym mis Mai yn arwydd os yw'r Ceidwadwyr yn gallu adfer peth o'r gefnogaeth y maen nhw wedi ei cholli.
Cawn weld os mae’r polisïau a gyhoeddwyd heddiw yn cychwyn y broses hon.
Ffynhonnell y llun, Getty ImagesDarren Millar gyda arweinydd y Ceidwadwyr, Kemi Badenoch
Mae'r Ceidwadwyr wedi perfformio yn wael mewn arolygon barn diweddar gyda rhai yn awgrymu y gallen nhw ddod yn bedwerydd yn yr etholiad.
Enillon nhw 16 sedd yn yr etholiad diwethaf yn 2021, gan ei gwneud yr ail blaid fwyaf ar y pryd, ond mae nhw wedi colli Aelodau o'r Senedd ers hynny.
Maen nhw hefyd wedi colli aelodau o staff i Reform.
Bethan Lewis
Gohebydd Addysg a Theulu BBC Cymru
Mae cyllid myfyrwyr – yn enwedig ad-dalu benthyciadau – wedi bod yn bwnc llosg yn ddiweddar yn sgil cynlluniau Llywodraeth y Deyrnas Unedig i newid y drefn i fyfyrwyr Lloegr.
Mae’r Ceidwadwyr Cymreig yn cynnig codi llai ar fyfyrwyr i astudio pynciau penodol ac yn dweud y bydden nhw’n ad-dalu ffioedd y rhai sy’n astudio yng Nghymru ac yn aros yn y wlad i weithio yn y gwasanaeth iechyd neu ysgolion.
Mae’n siŵr y byddai prifysgolion yn chwilio am sicrwydd na fyddan nhw’n colli unrhyw gyllid yn sgil torri ffioedd rhai myfyrwyr.
Ond mae’n bosib byddai croeso yn y byd addysg uwch i gymhelliad i bobl ifanc aros yng Nghymru i hyfforddi fel meddygon neu athrawon.
Gobaith y Ceidwadwyr yw y byddai hynny hefyd yn helpu i ateb y broblem recriwtio sylweddol mae ysgolion yn wynebu.
Ffynhonnell y llun, PAGeorge Herd
BBC News Verify
Mae'r maniffesto yn addo lleihau cyfradd sylfaenol treth incwm yng Nghymru o un geiniog os bydd y Torïaid yn ennill yr etholiad - gan roi £450 y flwyddyn yn ôl i deuluoedd sy'n gweithio.
Felly sut mae hynny'n gweithio?
Yng Nghymru, mae bron i 90% o dalwyr treth incwm ar y gyfradd sylfaenol gan eu bod yn ennill llai na £50,271 - y trothwy a gafodd ei osod gan Lywodraeth y DU.
Caiff y refeniw treth a gynhyrchir gan y rhai sy'n talu ei rannu rhwng Trysorlys y DU a choffrau Llywodraeth Cymru.
Ar hyn o bryd, ar gyfer pob £1 sy'n cael ei dalu gan drethdalwyr cyfradd sylfaenol yng Nghymru, mae 10c yn mynd i San Steffan, a 10c yn mynd i Fae Caerdydd. Er hyn, fe all gwleidyddion yn y Senedd ofyn am fwy - neu lai - pe baen nhw eisiau.
Byddai cynyddu'r elfen Gymreig o'r dreth incwm ar gyfer trethdalwyr cyfradd sylfaenol o 1c y flwyddyn dreth nesaf, yn golygu £311m yn ychwanegol i Lywodraeth Cymru i wario fel y maen nhw'n ei ddymuno.
Yn yr un modd, byddai toriad o 1c hefyd yn gweld swm y dreth incwm Cymreig yn gostwng yr un maint - gan arbed i'r rhai sy'n talu'r gyfradd sylfaenol tua £220 ar gyfartaledd yn y flwyddyn gyntaf - neu bron i £450 y flwyddyn - addewid y Ceidwadwyr Cymreig ar gyfer teulu lle mae dau oedolyn yn gweithio.
Ond o dan y cytundebau rhwng y DU a Llywodraeth Cymru, mae'r baich o gynyddu neu leihau trethi yng Nghymru yn disgyn ar y senedd ddatganoledig.
Bydd torri 1c o gyfraddau Cymru yn golygu mwy na £300m yn llai mewn treth incwm i Lywodraeth Cymru - ac ni fydd Llywodraeth y DU yn gwneud fyny am y diffyg hwnnw yn y grant bloc sy'n cael ei roi i Gymru.
Felly, er y byddai gan drethdalwyr ychydig o arian ychwanegol yn y banc, byddai llai o arian yn gyffredinol yng nghyllideb Llywodraeth Cymru.
Ffynhonnell y llun, Getty ImagesYmhlith addewidion y Ceidwadwyr mae torri ceiniog oddi ar gyfradd sylfaenol treth incwm.
Bydd hynny yn arbed £450 y flwyddyn i deuluoedd cyffredin sy'n gweithio, medd Darren Millar.
Ffynhonnell y llun, Getty Images
Darren Millar yn cyflwyno ei araith
Natasha Asghar AS yn cyflwyno Darren Millar
Y gynulleidfa yn y lansiad yng Ngwesty Dewi Sant ym Mae Caerdydd
Clawr llyfryn maniffesto y Ceidwadwyr Cymreig
Mae rhai o'r etholaethau newydd yn anferth, gyda Gwynedd Maldwyn yn ymestyn o ben pellaf Llŷn yr holl ffordd i'r ffin â Lloegr.
Dyma'r rhestr yn llawn:
Wrth gyflwyno'r maniffesto dywedodd Darren Millar y byddai'n atgyfodi Asiantaeth Datblygu Cymru.
Cwango oedd Awdurdod Datblygu Cymru.
Fe'i sefydlwyd yn 1976 gyda'r nod o achub economi Cymru drwy gefnogi datblygiad busnes a buddsoddiad yng Nghymru, clirio tir diffaith ac annog twf busnesau lleol.
Cafodd yr Awdurdod ei sefydlu o dan Ddeddf Awdurdod Datblygu Cymru gan Ysgrifennydd Gwladol Cymru ar y pryd John Morris, AS Aberafan.
Cafodd ei ddiddymu yn Ebrill 2006 a chafodd ei ddyletswyddau eu trosglwyddo i Lywodraeth Cymru.
Ffynhonnell y llun, WicipediaElliw Gwawr
Gohebydd Gwleidyddol BBC Cymru
Mae na lot o wariant yn y maniffesto yma, felly o le fydd yr arian yn dod?
Mae torri ar dreth incwm, cael gwared o'r dreth trafodiadau tir a'r arian ychwanegol yn dod i £558m.
Mae Darren Millar wedi dweud y byddai'n torri ar wastraff, yn gwyrdroi'r cynnydd ym maint y senedd, ac yn peidio â gwario ar feysydd na sydd wedi'u datganoli.
Ond y gwirionedd yw bod torri ar wastraff yn haws dweud na gwneud.
Ac o ran y polisïau hynny y gallen nhw dorri, fydde nhw ddim yn arbed y math o symiau sydd eu hangen i dalu am rhain.
Mae'r costau ychwanegol o Senedd fwy yn £12.7m y flwyddyn, a does dim modd gwyrdroi hyn dros nos.
Mae'r cynllun cenedl noddfa wedi costio £62.87m ers ei lansio yn 2019, ac ar hyn o bryd mae Llywodraeth Cymru yn gwario £270,000 y flwyddyn ar blannu coed yn Uganda.
Dywed Millar nad ydyn nhw wedi gwneud unrhyw fodelu ar gyfer nifer y plant a allai gael eu niweidio trwy godi 20mya yn ôl i 30mya.
Dywed arweinydd Torïaidd y Senedd bod y mater yn aml yn codi ar garreg y drws ac mewn e-byst.
Ffynhonnell y llun, Getty Images