Enw'r adolygydd
Adolygiad gan Bedwyr Owen.

Awyrgylch
Roedd awyrgylch da i'r noson. Gyda chymysgedd o ffyddloniaid yr SRG (Sîn Roc Gymraeg) a dilynwyr mwy diweddar The Heights. Nid oedd Barfly yn orlawn ac felly roedd digon o le i ddarparu ar gyfer y mosho yn y blaen a hynny heb aflonyddu ar y gwrandawyr mwy astud yn y cefn.

Trac y Noson
Yn fy marn i heb os mai 'Dafad Ddu' gan y Sibrydion oedd y trac mwya' cofiadwy o'r noson. Gyda Meilyr yn neidio o amgylch y llwyfan a Rhys fel pe bai'n caru gyda'i gitar fas!

Disgrifiwch y perfformiadau

Kardoman - Cefais fy siomi ar yr ochr orau gan Kardoman, a agorodd y noson. Nid oeddwn wedi eu clywed o'r blaen ac roedd yn fraint gwrando ar fand newydd, gwahanol. Cerddoriaeth nerthol a lleisydd hyderus.

Sibrydion - Nid oes angen cyflwyniad i'r Sibrydion. Cafwyd perfformiad anhygoel arall ganddyn nhw. Roeddynt yn ddiolchgar iawn o gael chwarae, ond y gynulleidfa a oedd fwyaf diolchgar wedi eu set rymus. Dyma fand sydd â steil hollol wreiddiol ac unigryw, ac uchelgais credadwy.

The Heights - Yn cloi y noson, a hynny mewn steil, oedd band sydd ar y ffordd i wireddu eu uchelgais, The Heights. Bydd llawer yn eu cofio fel Y Gogz o Fethel, ger Caernarfon. Nawr mae nhw wedi cyrraedd yr uchelfannau ac mae'n hawdd dallt pam. Gyda cyfuniad o roc caled a chaneuon araf roedd rhywbeth at ddant pawb yn eu set. Roedd yn braf clywed y fersiwn Gymraeg o'r glasur 'Ffordd Hir Nôl' a hynny o flaen eu cefnogwyr mwyaf blaenllaw. Mi gymerith fwy na cytundeb record i hogia'r Bethel anghofio eu gwreiddiau.

Uchafbwynt y noson
'Ffordd Hir Nôl' gan The Heights a 'casŵio' gwallgo y Sibrydion!

Y peth gwaethaf am y noson
Er fod Barfly yn un o safleodd prysura'r brifddinas o ran nosweithiau cerddorol o safon mae lleoliad y colofnau trwchus sy rhwng y bar a'r llawr yn rwystredigaeth mawr. Yn enwedig i'r rhai hynny sy'n ffafrio eu cefnau at y bar. 'Y Barflies'!!?

Beth sy'n aros yn y cof?
Y cyfeillgarwch rhwng y bandiau wrth iddynt estyn cymeradwyaeth i'w gilydd yng nghanol eu setiau. Dangosodd hyn y parch sydd gan gerddorwyr talentog tuag at ei gilydd y dyddiau hyn. Yn enwedig ar y cylchdaith Cymraeg.

Achlysur Roc a Rôl
Meilyr 'Sibrydion' yn lluchio gasŵ i'r gynulleidfa a'n gwahodd i ymuno yn yr hwyl!

Talent gorau'r noson?
Talent gorau'r noson heb os oedd 'The Heights'. Rydym yn ymwybodol o bedigri'r 'Sibrydion' ers ymhell dros ddegawd, ond mae'r 'Heights' wedi datblygu o nunlle bron, i fod fod yn un o'r bandiau ifanc mwyaf talentog i'w clywed ers blynyddoedd.

Marciau allan o ddeg
I'r gig yn gyffredinol rhaid rhoi 9/10. Buasai'n 10/10 oni bai fod oriau cau 'Barfly' yn rhy fuan. 10/10 i'r tri band am eu ymrwymiad, a'u llwyddiant i godi'r dorf a oedd ar brydiau yn ymddangos yn wangalon.

Un gair am y gig
Pwysig.

Unrhyw sylwadau eraill?
Gobeithio y gwelwn ni fwy o nosweithiau Cymraeg tebyg i hon yn y dyfodol agos. A hynny mewn mwy o leoliadau gwahanol. Mwy fel rhain ac mae dyfodol y SRG yn flodeuog. Da iawn!

Cysylltiadau'r we
Sesiwn Sibrydion i C2
Sesiwn Gogz (The Heights) i C2
Gwefan The Heights

Nid yw'r BBC yn gyfrifol am unrhyw wefan allanol y cysylltir iddi o'r tudalennau yma.