Mae fy ngŵr yn cael ei ben blwydd ar yr un penwythnos a gan nad yw miwsig o ddiddordeb iddo, dwi'n mynd hebddo fo. Ddylwn i fynd a fo allan i ddathlu ond dwi ddim!

P'ryn yw eich hoff noson - pop, opera, caneuon o'r sioeau neu Tân y Ddraig?
Mae pob nos yn wahanol. Fel arfer, nos Sul a chaneuon o'r sioeau yw fy hoff un. Ond dwi'n aelod o gôr lleol ac efo diddordeb mewn pob math o gerddoriaeth.

Mae fy mab wedi bod i'r cyngherddau efo fi ers yn fabi bach ac eleni fo sydd wedi gofyn i ni fynd i'r noson opera!

P'ryn yw'r noson fwyaf cofiadwy hyd yn hyn?
Heb ei ail, noson yr opera dwy flynedd yn ôl. Doedd neb callach pwy oedd y ddau ganwyr ifanc, ond roeddent yn wefreiddiol.

Hefyd, roedd ymweliad cyntaf Michael Ball yn un ddaru greu naws y Faenol i mi - y peth sy'n denu pobl yn ôl tro ar ôl thro.

Unrhyw bethau wedi mynd o'i le?
Wel, y glaw wrth gwrs. Nid oes gŵyl y Faenol wedi bod heb iddi lawio ar o leiaf un noson! Ond mae bod yn fodlon gwlychu ychydig yn rhan o'r hŵyl.

Mae'r traffig i gyrraedd a gadael yr ŵyl yn gallu bod yn anodd wrth gwrs. Mae wedi cymryd rhwng hanner awr a thair awr i gyrraedd adref. Ond er tegwch dwi ddim yn gwybod beth all y trefnwyr ei wneud. Os byse pawb yn gwrando ar y stiwardiaid yn lle creu rhyw ddeg lôn wrth giwio i fynd allan, byse pethau'n well.

Pwy fysech chi yn hoffi weld yn dod i'r ŵyl yn y dyfodol?
Fel un o ffans mwyaf Donnie Osmond, rhaid i mi ddweud fo! Dwi ddim yn gwybod am hanner arall pobl gogledd Cymru, ond sw ni'n mwynhau! Mae pawb yn gwybod fod Bryn Terfel eisio denu Tom Jones - dwi ddim yn meddwl bydd o'n restio nes iddo wneud hynny.

Oes yna unrhyw bethau rydych yn ei wneud pob flwyddyn?
Dwi wastad yn mynd a lot fawr o fwyd - fysa chi byth yn credu fy mil yn Tesco! Mae pawb sy'n fy adnabod yn dod draw i weld pa bethau da sydd yn y bocs!

Rydym wastad yn eistedd jest tu ôl i'r cadeiriau, draw i'r dde. Rydym reit wrth y sustem sain a'r sgrin fawr rhag ofn na allwn weld y perfformwyr ar y llwyfan yn dda. Ni fuaswn yn hoffi eistedd yn y cadeiriau. Rhan o naws yr ŵyl yw cael picnic ac eistedd gyda'ch ffrindiau. Mae o braidd yn gyfyng yn y seddi.

Oes gennych chi unrhyw gyngor i bobl eraill sy'n mynd i'r Faenol?
Os ydych yn hapus efo'r un lleoliad, cyrhaeddwch yn gynnar a chiwio. Dwi'n cyrraedd am ryw dri o'r gloch, yn ciwio am awr neu ddwy wrth wrando arnynt yn ymarfer ar y llwyfan a chael blâs o beth sydd am ddod. Cyrhaeddais yn hwyr un flwyddyn ac roedd yn rhaid i ni eistedd ym mhellach i fyny'r allt - nes i ddim ei fwynhau gymaint fyny fa'na.

Oes yna unrhyw beth gall y trefnwyr ei wneud i wella'r ŵyl?
Gwahodd côr lleol i berfformio fel warm up act. Byse'n dda rhoi'r cyfle i bobl o'r ardal cymryd rhan yn yr ŵyl 'bach mwy. Katherine Owen