"Sioe wedi ei chomisiynu gan Rygarug nôl yn 2003 ydy Copa Caban sydd wedi ei hysgrifennu gan Mair Tomos Ifans gyda'r gerddoriaeth gan Siân Wheyway. Mi gafodd ei pherfformio yn wreiddiol yn Theatr Seilo yn 2004 ac roedd y clwb yn awyddus i'w hail godi at yr eisteddfod.

"Mae hi'n delio efo chwedlau a hanesion y rhan yma o'r byd gyda phrif gymeriadau fel Marged Fwyn ach Ifan, Llwyth yr Ordoficiad, a oedd yn byw yn y mynyddoedd, a chwedl y 'nocars' - sef chwedl leol am dylwyth teg a oedd yn rhybuddio chwarelwyr o berygl.

"Mae'r sioe wedi ei seilio ar stori am gaffi copa'r Wyddfa. Mae'r gwaith o godi'r caffi wedi mynd allan i dendar ac mae cwmni rhyngwladol yn mynd o amgylch yn chwilio am gliwiau yn yr ardal ac yn dod ar draws yr holl chwedlau lleol yn sgîl hynny. Hefyd, wrth gwrs mae yn ddyn drwg o'r enw RG - sef Rhitta Gawr - ac mae arwyr a ffrindiau'r Brenin Arthur yn ymweld i geisio adfer y sefyllfa.

"Mae tua 80 o blant rhwng 7 - 13 oed yn cymryd rhan - yn actorion, cantorion a dawnswyr. Fe sefydlwyd Clwb Rygarug rhyw bum mlynedd yn ôl ar gyfer plant pentrefi Dyffryn Peris - Llanrug, Llanberis, Deiniolen, Penisarwaun, Cwm y Glo ac i lawr am Bontrug a Llanwnda. Yn ogystal â chyflwyno sioeau mae'r clwb yn cynnig dosbarthiadau drama a dawns a chyrsiau aml-gyfrwng i blant yr ardal. Dim ond £1 y wers rydyn ni'n ei godi. Mae hynny'n bolisi er mwyn trïo peidio â chau neb allan ar sail eu sefyllfa economaidd.

"Gan fod rhieni a chyfeillion lleol wedi cael cyfle i weld y sioe eisoes, rydyn ni'n gobeithio ei pherfformio i gynulleidfa ehangach yn yr eisteddfod a chyflwyno pobl i ddiwylliant, bwrlwm a chwedlau'r rhan yma o'r byd.

"Cri sy'n cael ei chlywed yn aml ydy nad oes digon o bethau i'w wneud yn yr eisteddfod ar gyfer rhieni â phlant ifanc sy'n aros yn y maes carafannau ac mi fydd hon yn noson ddelfrydol iddyn nhw, ac i blant o bob oed mewn gwirionedd - sioe gerddorol, hwyliog, liwgar efo 80 o blant Dyffryn Peris yn canu, dawnsio ac actio."