Maes Gwyn
(Maesgwyn, Carmel - cartref bore oes Elen Williams)

Yno y cerddais gyntaf
Yn rhydd ac ysgafn droed,
Dotio at liw y blodau
A sibrwd dail y coed.

Yno y teimlais gyntaf
Ofal fy nhad a mam,
Dechrau sylweddoli
Na chefais unrhyw gam.

Yno rhedais drwy'r caeau
Yng nghwmni Pero y ci,
Edrych ar dyfiant natur
Gwylio'r wylan a'i chri.

Yna daeth dyddiau ysgol
A theimlo newid byd,
Cyfarfod ffrindiau newydd
Cof amdanynt o hyd.

Yna daeth dydd ffarwelio
Teimlo yn drist a syn,
Perlau fy rhawd yw cofio
Dyddiau ieuenctid Maes Gwyn

Emyn ar gyfer plant

Ar ein gyrfa yn y byd
D'ofal Di a gawn o hyd,
Yn yr ysgol, nodda ni
Dysgwn dy glodfori Di.

Diolch am gartrefi clyd
Bwyd yn sicr gawn bob pryd
Tad a mam i'n gwarchod ni,
Diolch Arglwydd oll i Ti.

Am y blodau yn yr ardd
Am bob peth sy'n dlws a hard
Am gael clywed adar mân
Yn telori hyfryd gân.

Diolch i Ti Arglwydd da
Am ein cadw rhag pob pla,
Cofia blant sydd arnynt nam
Gwarchod hwy rhag unrhyw gam.

Cofia Gymru gwlad y gân
Cadw'n hiaith yn bur a glân,
Cadw'r Sul yn ddydd i Ti
Arwain ni i'th foli Di.