"Cyn y rhyfel, roedd Y Bermo yn seaside resort hen ffasiwn. Roedd gennym ni Punch and Judy gyda Harry Kirk a mulod yn mynd i fyny ac i lawr y traeth - 'Plîs mam, ga i fara i fynd i fwydo'r mulod?' - a'u dilyn nhw a Huw Jones y Mulod adref.

Mi fyddai'r hen foi arall 'ma yn sefyll ar y stryd gyda chap am ei ben gyda 'Guide to Cader' arno. Byddai'n mynd â phobl i fyny Cader Idris am dro.

Dwi'n cofio'r concert party yn dod yma bob blwyddyn yng ngofal Bert Stanley a'i wraig. Byddent yn adeiladu llwyfan mawr ar y prom ac roedd yna ganu, comedi a dancing girls. Roeddem hefyd yn cynnal cyngherddau yn y Concert Hall fel rhan o glwb celfyddydau y Bermo, adeilad mawr pren oedd ger lle mae ffair Las Vegas rŵan.

Roedd yna hefyd dripiau cwch o'r cei yn mynd draw i Benmaenpŵl ac yn ôl ac roedd yna dau garej - White Garage a Green Garage - y ddau yn cynnig tripiau mewn siarabang draw i Eryri a'r Wyddfa.

Byddai pawb ran fwyaf yn dod i'r Bermo ar y trên - rhai gyda deg cerbyd arnynt! Byddent yn gollwng pobl yn y stesion a dyna nhw, fel chwain yn crwydro dros y Bermo.

Ond ar ddiwedd yr haf, byddai pobl busnes Bermo yn mynd yn ôl ar y trên draw i Lerpwl. Ar ôl gweithio'n brysur drwy'r gwyliau, roedd yn treat i bawb cael diwrnod i ffwrdd - y dynion yn mynd i gêm bêl-droed a'r merched i siopa. Yna byddai pawb yn cyfarfod i fynd i weld sioe yn y theatr cyn landio adref am un y bore.

Roedd yna gymdeithas Gymreig gryf hefyd.

Roedd 'na sawl eisteddfod yn y Bermo. Yr eisteddfod fach, sef cyfarfod bach yn y capel i'r bobl leol. Dwi'n cofio cael tair ceiniog am ennill cystadleuaeth canu - roedd yn ffordd wych i'r plant hel pres poced.

Y step nesaf oedd Eisteddfod yr Urdd, gyda phawb yn dysgu penillion neu gân i'r eisteddfod cylch, sir a'r un mawr, y genedlaethol. Dwi'n cofio cael fy ngyrru at Lewis Williams am hyfforddiant perfformio gan mam - roedd hi'n ei gymryd i gyd yn 'seriws' iawn.

Yna, roedd eisteddfod y County School, gydag un o'r seniors yn cael eu cadeirio a phopeth. Roedd pawb yn ei gymryd yn 'seriws' iawn.

Ond yr eisteddfod bwysicaf un oedd Eisteddfod Pasg y Bermo, wastad ar ddydd Llun y Pasg. Mi fyddai cantorion o ledled y sir yn dod ac roedd y cystadlu yn parhau tan oriau mân y bore. Cynhaliwyd yr eisteddfod yma yn yr hen bafiliwn, lle mae clwb nos Sand Dancer rŵan. Roedd yn orlawn ac roedd pawb bron o safon broffesiynol.

Roedd yna sawl côr yn y Bermo hefyd. Côr Dr Heath, Sais o'r dref oedd yn gerddor a chyfansoddwr gwych. Roedd gan gigydd lleol, Lewis Williams, gôr hefyd, yn ogystal ag un i'r plant a chôr meibion. Roedd yn lle cerddorol iawn.

Mi fyddai Telynor Mawddwy yn ein hyfforddi ni'r plant ifanc ar sut i ganu penillion. Roedd Telynor Mawddwy, sef Dafydd Roberts, yn wreiddiol o Ddinas Mawddwy, yn hollol ddall. Collodd ei olwg yn blentyn ond dysgodd i chwarae'r delyn a chanu penillion yn ifanc ar roedd yn wych.

Byddai hefyd yn chwarae ei delyn i lawr ger y traeth i'r ymwelwyr yn yr haf. Roedd Bermo mor lwcus i'w gael o yn ein plith."

Nôl i atgofion Nansi am gyfnod y rhyfel yn y Bermo