Y mis yma mae dirgelwch y cerrig yn cael ei ddatrys.

Nid cerrig ond meinciau yw'r meini fu'n achos crafu pen i rai wrth gerdded y Lon.

Erbyn hyn mae darnau o bren wedi eu gosod i gysylltu'r cerrig i greu meinciau i gerddwyr blinedig.

Cynlluniwyd y meinciau gan Dafydd Davies-Hughes, Felin Uchaf, Rhoshirwaun.

Bu'n cydweithio gyda disgyblion ysgolion Chwilog a Llanystumdwy, ac mae'r deunyddiau yn adlewyrchu'r hyn sydd i'w gweld wrth gerdded y Lon Goed.

Gosodwyd dwy o'r meinciau rhwng Chwilog Bach a Chapel Engedi a dwy arall yn uwch i fyny; y naill yng nghyffiniau Rhosgyll a'r llall ger Coed Cae Du a Chefn Pencoed.

Ar y fainc yn y llun ceir cwpled o waith Eben Fardd; '0 Chwilog iach olau, Bro Annwyl a'i Bryniau' .

Daeth y cyllid ar gyfer y gwaith o Gronfa Treftadaeth y Loteri, a chan y Cyngor Cefn Gwlad.

Yn ôl Haydn Hughes, Uwch Warden Cefn Gwlad, Cyngor Gwynedd, mae mwy o welliannau ar y gweill, gan gynnwys rhai giatiau newydd a cherfluniau o waith y plant.

Mae'r meinciau yn werth eu gweld; ewch draw am dro i gael gweld drosoch eich hun. Y Ffynnon