Mae'r llyfr yn adrodd hanes bywyd smyglwr cyffuriau o Brydain yn y carchar ym Molivia.

Mi gychwynnodd o smyglo twristiaid i mewn i'r carchar am guided tours, drwy breibio'r swyddogion.

Bron ddeg mlynedd ar ôl ei ryddhau, a dyma ni'n penderfynu trio torri mewn i San Pedro.

'Chydig o alwadau ffôn yn ddiweddarach, ac wedi gwagio cynnwys fy mhwrs i ddwylo'r swyddogion dyma ni yn eistedd yng nghell carcharor un glust, milain yr olwg.

Roedd Pepe yn llywydd ar y grŵp motobeics Bandidos yn Ne America, ac yn gwerthu cocen a chanabis yn y carchar i wneud digon o arian i dalu am ei gell, a oedd yn cynnwys teledu, cyfrifiadur a gwely i'w bodyguard.

Mae carchar San Pedro yn unigryw, gan fod rhaid i'r carcharorion i gyd dalu am eu lle. Darllenwch y llyfr!

Yna, mi fues i ar lyn enfawr Titicaca yn aros gyda theulu brodorol. Mae nhw'n tyfu llysiau o bob math, ac yn gweu crefftau er mwyn gwneud bywoliaeth.

Mi ddringon ni i fyny i gopa mynydd enfawr, Pachadada - y Tad Ddaear i wneud tri dymuniad.

Dychmygwch y lle mwya ynysig ac anial erioed - mynydd uchel, filltiroedd o'r pentref bychan, ar ynys yng nghanolllyn enfawr, dair awr i ffwrdd o'r lan.

Dyma gyrraedd y top, a gwerthfawrogi'r tawelwch mawr am eiliad, cyn sylwi fod yna ddegau o stondinoedd ar y top yn gwerthu Snickers.

Dwi newydd gyrraedd yn ôl o daith gerdded pedwar diwrnod o hyd I Machu Picchu.

Mi funon ni yn rhynnu mewn tent am ddwy noson a hithau yn rhewi tu allan.

Mi gafon ni ein dilyn gan lamas ac alpac, mi gollon ni ein gwynt yn yr uchdwr mawr (4,200 metr).

Mi welson ni lynnoedd gleision a mynyddoedd gwynion.

Mi gafon ni swper mewn tyddynod y bobl leol frodorol - lle'r oedd moch cwta yn rhedeg rhydd o dan ein traed.

Roedden nhw'n cael eu bwydo yn dda, ac y eu bwyta ar adegau arbennig - dyma fwyd cenedlaethol Peru.

Yna, bore ddoe - mi godon ni am 3.30am, a cherdded i fyny cannoedd o risiau serth yn y tywyllwch i gyrraedd Machu Picchu cyn y tyrfaoedd.

Roedd o'n anhygoel - a'r olygfa yn ystod y wawr yn edrych yn well hyd yn oed nac y mae ar gardiau post.

Mewn wythnos mi fyddwn yn gadael am Panama a Chanolbarth America, ble mae fy ambarel!?