Fe drodd Eisteddfod Gadeiriol y Ffôr yn eisteddfod ryngwladol am noson eleni a hynny gyda help ffôn symudol a phrifardd cymwynasgar.

Er na allai bardd buddugol y gadair, Mr Geraint Roberts o Lanelli, fod yn bresennol yng nghapel Ebeneser ar y 3ydd o Ebrill, fe allodd gymryd rhan yn y seremoni gadeirio.

Eluned Parry, ysgrifenyddes yr eisteddfod, sydd â'r hanes:

"Fe grewyd hanes yn Eisteddfod y Ffôr eleni pan enillwyd y gadair gan Mr Geraint Roberts, Prifathro Ysgol Gyfun y Strade, Llanelli.

"Cafodd y bardd ei gynrychioli gan ei fab, Llŷr, a hynny am fod y bardd ar bererindod farddonol at fedd Hedd Wyn i Ffrainc.

"Pan ganodd Einir y corn gwlad, roedd ffôn symudol Llŷr ymlaen, a'i dad yn sefyll i gael ei gadeirio yr un pryd yn Ffrainc gan y Prifardd Tudur Dylan Jones. Roedd y seremoni i gyd yn cael ei throsglwyddo dros y ffôn o'r Ffôr i Ffrainc.

"Dywedodd Geraint Lloyd Owen a arweiniai y seremoni fod hyn yn rhywbeth unigryw iawn. Tybed a ddigwyddodd hyn mewn unrhyw eisteddfod o'r blaen? Buasai'n ddiddorol gwybod ymhle a pha bryd?"

Fe dorrwyd record arall yn y gystadleuaeth i bobl ifanc 15 - 25 oed gyda 75 o gyfansoddiadau yn dod i law! Yr enillydd oedd Llinos Dafydd o Landysul (enillydd Cadair yr Ifanc yn Eisteddfod Llanllyfni eleni) gyda Dafydd Hughes a Rhiannon Hughes o Gricieth yn ail a thrydydd. Da gwybod nad yw'r diddordeb ymhlith yr ifainc yn pylu dim!

Ymhlith enillwyr y cystadlaethau agored oedd enillydd cadair Llanllyfni, T Graham Williams o Abertawe. Daeth i'r brig yn y Ffôr yng nghystadleuaeth y Stori Fer.