Cynhaliwyd yr eisteddfod yng nghapel y pentref hyd y 1990au. Bu'n rhaid i bawb adael yr adeilad un flwyddyn oherwydd ofnau bod yr adeilad ar dân pan ddechreuodd lenwi efo mwg. Yn ffodus, roedd prifathro Ysgol Bro Plenydd, Mr Geraint Lloyd Owen, cadeirydd y pwyllgor, wrth law i gynnig ganolfan gymdeithasol yr ysgol ar fyr rybudd.

Oherwydd mwy o anawsterau gyda'r capel, bu'n rhaid cynnal yr eisteddfod y tu allan i bentref y Ffôr yn y 1990au, pan symudwyd hi heb lawer o rybudd i Neuadd Bentref Chwilog.

Wedi hynny, ad-drefnwyd y capel, a chynhelir yr eisteddfod rŵan yn hen festri'r capel, yr ysgoldy, sef Capel Ebenezer bellach.

Y saer lleol, Eryl Jones Ty'n Giât, fydd yn llunio'r gadair i'r bardd buddugol bob blwyddyn. Enillwyd un o'i gadeiriau enwocaf, wedi'i llunio o nodau hen organ, gan y Prifardd RO Williams o'r Bala, gynt o ardal Pen Llŷn.

Yn 2003 daeth nifer o'r unigolion oedd yn flaenllaw yn yr eisteddfod wreiddiol at ei gilydd. Daeth TJ Williams o Lanrwst yn ôl i feirniadu'r canu, Geraint Lloyd Owen a Gwilym Gruffydd yn Llywyddion ac Eluned Parry yn Ysgrifenyddes yr eisteddfod.