Enillodd Mark Webster, llanc ifanc o Ddinbych, Bencampwriaeth Dartiau'r Byd ym mis Ionawr, 2008.

Curodd Simon Whitlock o Awstralia 7-5 mewn gornest derfynol gyffrous yn y Lakeside yn Frimley Green, ar ôl bod ar y blaen drwy gydol y gêm derfynol. Roedd llu o gefnogwyr swnllyd o Ddyffryn Clwyd yno i roi hwb iddo.

Daeth â chlod mawr i'w wlad a chipiodd y brif wobr o £85,000, sy'n cadarnhau ei le fel un o arwyr y byd dartiau, er y cyfyngwyd ef hyd yn hyn i chwarae'n rhan amser, gan gynnal ei hun hefyd drwy waith plymio o dro i dro.

Ei dafarn leol yw'r Golden Lion yn Ninbych; ni ddechreuodd chwarae dartiau tan roedd yn ddeunaw oed.

Mark yw'r trydydd Cymro i ennill pencampwriaeth y BDO (Sefydliad Dartiau Prydain) gan ddilyn yn ôl troed y diweddar Leighton Rees a Richie Burnett. Gwobr Leighton Rees oedd £3,000.

Nid oes gan Mark ffug enw, fel y rhan fwyaf o'r chwaraewyr eraill, ond cysylltir ef a'r gân Jump gan Van Halen, ei gerddoriaeth agoriadol.

Daeth i'r brig drwy ennill Cwpan y Byd (Senglau) yn 2007. Enillodd Gwpan Ewrop Ffederasiwn Dartiau'r Byd yn 2006, a chyrhaeddodd y rownd gyn-derfynol yng Nghystadleuaeth Meistri'r Byd Winmau yr un flwyddyn. Enillodd hefyd Gystadleuaeth Agored Cymru, y Clasur Gymreig, a Chystadleuaeth Agored Canada. Mae wedi curo'r goreuon, yn eu plith Phil Tailor.

"Fedra i ddim coelio'r peth," meddai Mark, sy'n chwarae gyda'i law chwith. "Dw i ddim yn meddwl y buaswn i wedi medru mynd ymlaen lawer mwy."

Ond er ei fuddugoliaeth fythgofiadwy - a'r sws gafodd gan ei gariad Lorraine! - bydd Mark yn dal ymlaen gyda'i gwrs plymio yn y coleg lleol.

"Wnes i fwynhau fy hun - mae'n rhaid i chi, oherwydd does dim sicrwydd y cewch gymryd rhan eto ym mhencampwriaeth y byd. Rydw i wedi dotio. Mae gen i un diwrnod i ffwrdd, ac wedyn dwi nôl yn y coleg!"