Wedi'r holl edrych ymlaen, yr ewfforia yn y brifddianas a'r balchder cenedlaethol fe gymerodd hi gamgymeriad gan ŵr o'r Ffindir a gôl gan ymosodwr o Nigeria i roi stop ar bethau.

Ers wythnosau lawer 'roedd y paratoi at y gêm derfynol wedi bod yn cynyddu'n raddol gan gyrraedd uchafbwynt dros yr wythnos ddiwethaf.

Wedi'r cyfan 'roedd hi'n 81 mlynedd ers i Gaerdydd gyrraedd y rownd derfynol a 'roedd perffaith hawl gan y cefnogwyr a'r cyfryngau i wneud y mwyaf o'r achlysur hanesyddol.

Yn y diwedd 'roedd yr hyn a gafwyd cyn y gêm lawn cystal â'r gêm ei hun.

Wedi'r holl drafod am ganu'r anthemau a'r ffaith mai Katherine Jenkins fyddai'n gwneud hynny, sicrhaodd problem dechnegol gyda'r meic na fyddai neb yn clywed pennill cyntaf Abide with Me o enau'r gantores o Gastell Nedd.

Bydd cystadleuwyr Eisteddfod yr Urdd yn disgwyl gwell na hyn yn Sir Conwy wythnos nesaf!

Do, fe welwyd y cefnogwyr yn difrïo'r anthemau ond wrth edrych ar y ddau dîm 'doedd yr un o'r ddwy anthem yn berthnasol i fwyafrif y chwaraewr gan mai prin oedd y Cymry a'r Saeson yn y ddau dîm.

Roedd balchder y cefnogwyr fodd bynnag yn amlwg a rhaid llongyfarch Cymdeithas Bêl-droed Lloegr am ganiatáu i'r ddwy anthem gael eu canu.

Byddai'r papurau Llundeinig wedi bod wrth eu bodd yn lladd ar gefnogwyr Caerdydd am darfu ar God Save the Queen..

O leiaf 'roedd caniatáu canu Hen Wlad Fy Nhadau hefyf yn profi fod y ddau set o gefnogwyr gynddrwg â'i gilydd.

Roedd John Motson yn cydnabod fod yr awyrgylch cyn y gêm yn 'return to the real FA Cup'.

Nid y cefnogwyr achlysurol oedd wedi hen arfer ag ymweld â Wembley oedd y rhain ond gwir ddilynwyr oedd yno i fwynhau achlysur unigryw.

Trueni nad oedd Motson a Lawrenson yn gallu cynnal y cyffro yn eu sylwebaeth a diolch byth am y botwm coch a chael clywed asbri Gareth Blainey, Malcolm Allen ac Iwan Roberts yn dadansoddi Cwpan Lloegr yn iaith y nefoedd!

Yn aml mae canlyniad gêm bêl-droed yn dibynnu ar ddigwyddiadau bychain.

Pe byddai Paul Parry wedi sgorio yn gynnar fe allai pethau wedi bod yn wahanol. Pe bai Peter Enckelman wedi dyrnu'r bel o afael Kanu a phe na bai Glen Loovens wedi llawio cyn rhoi'r bel yn y rhwyd. Pe bai....

Ar y cyfan, 'roedd Portsmouth yn haeddu'r fuddugoliaeth ond gall tîm Caerdydd fod yn falch o'u perfformiad.

Gall y cefnogwyr hefyd fod yn falch o'u hymddygiad gan roi delwedd bositif i Glwb Pêl-droed Caerdydd o flaen cynulleidfa fyd-eang.

Gyda'r holl sôn cyn y gêm at y troeon diwethaf i'r ddau glwb godi'r cwpan does ond gobeithio dau beth.

Y cyntaf yw na fydd ail-adrodd o'r hyn ddigwyddodd wedi i Portsmouth ennill y Cwpan yn 1939 - dechrau'r Ail Ryfel Byd.

Ar y llaw arall, wrth gofio Caerdydd yn ennill y Cwpan yn 1927 rhaid cofio fod yr Adar Gleision wedi cyrraedd y rownd derfynol ddwy flynedd ynghynt, yn 1925.

Does ond gobeithio y bydd hanes yn ail-adrodd y tro hwn ac y gwelir y fyddin las yn heidio nôl i Wembley mewn dwy flynedd ac y bydd meic Katherine Jenkins yn gweithio erbyn hynny.