Fflur Dafydd a'r Barf

Yn codi o ludw'r band 'girl power-pop'Johnny Panic / Y Panics ar ddechrau'r degawd, dechreuodd Fflur Dafydd ar ei thaith fel artist unigol drwy ryddhau'r albwm Coch Am Weddill Fy Oes yn 2004.

Yn glanio ar y sîn ar yr un pryd â Gwyneth Glyn a Lleuwen Steffan, roedd gan Fflur ei steil ei hun oedd yn adleisio cantorion-gyfansoddwyr Americanaidd y 70au, wedi eu sianelu drwy ysbryd y grŵp Jess a Huw Chiswell yn llywio'r cyfan.

Dawn dweud stori yn gryno mewn cân sydd gan Fflur, a gyda'i band Y Barf - wedi'u henwi ar ôl y blew bythol-bresennol ar wyneb ei phrif gitarydd, Rhys James - gall ymddangos ar ffurf baled tawel neu jam ffwnclyd.

Yn ymwybodol o'i hetifeddiaeth cerddorol Cymraeg, mae'r briodas eiriol ac offerynnol yn ei chaneuon yn un lwyddiannus iawn, gyda'r melys, y chwerw, y dathlu a'r hiraethu i gyd yn nodweddion sydd i'w clywed ar draws ei gwaith.

Yn dilyn rhyddhau'r ail albwm Un Ffordd Mas yn 2007 - a welodd ei chrefft yn aeddfedu eto - mae Byd Bach yn ein disgwyl ar ddiwedd 2009; trydedd albwm sydd yn cynnwys caneuon wedi'u seilio ar y llefydd hynny yng Nghymru sydd wedi gadael eu marc ar y gantores o Gaerfyrddin.

A hithau'n cyfuno gyrfa fel nofelydd, darlithwraig a chantores-gyfansoddwraig yn lwyddiannus dros ben, ni allwn ddianc rhag hon.

Ian Cottrell