Ble mae Ffarmwr, Llyfrgellydd, Myfyriwr a Swyddog Datblygu yn dod at ei gilydd i drafod hawliau dynol, rhyddid meddwl ac Undodiaeth?

Ar lwyfan Theatr Felin-fach, ym mhantomeim Ini Mini Meini Mowr, wrth gwrs!

Mae pantomeim Felin-fach yn enwog ers degawdau bellach, ac nid am straeon sy'n ymwneud ag ŵy aur neu goeden hud na hyd yn oed tywysoges sy'n troi'n bwmpen am hanner nos.

Yn hytrach, mae pantomeim Cwmni Actorion Felin-fach yn ymwneud â thema neu hanes lleol neu genedlaethol sy'n berthnasol i'r Gymru wledig.

"Mae digon o'r elfennau arferol mae rhywun yn ei ddisgwyl mewn pantomeim yn ein cynhyrchiad ni," medde Dwynwen Lloyd Evans, pennaeth y theatr, cyfarwyddwr ac arweinydd y prosiect.

"Digon o hud a lledrith, tylwyth teg, canu a dawnsio ac wrth gwrs yr elfen o ddrwg yn ceisio trechu da, ond yn ogystal â'r drygioni cyfarwydd o ariangarwch a hunanoldeb.

" Mae gan ein dynion drwg ni fwriad o racso cymdeithas cefen gwlad a thrwy hynny racso'n hiaith, diwylliant a'n treftadaeth ni."

Cysylltiad Iolo Morgannwg â Felin-fach yw gwraidd stori Ini Mini Meini Mowr.

Roedd Iolo yn gyfaill mawr i David Jenkin Rees, Llwyd Siac, ffermwr diwylliedig a blaenga.

Ac mi roedd y ddau yn allweddol wrth hyrwyddo achos Undodiaeth yn yr ardal, sy'n dal yn cael ei hadnabod, fel rhan o'r Smotyn Du - sef y rhannau hynny o Geredigion lle cydiodd Undodiaeth yn hytrach na Methodistiaeth.

"Mae Iolo Morgannwg yn gymeriad lliwgar iawn yn hanes Cymru fel bardd, diwygiwr, ffugiwr ac athrylith," medd Gary Davies, un o gast y cwmni sydd hefyd wedi cyfrannu at y sgriptio a'r cynhyrchu.

"Ac mae'r panto'n ein cludo ni nôl i'r flwyddyn 1802, cyn fod Iolo wedi sefydlu Gorsedd y Beirdd, cyn Helyntion Beca ac yng nghanol cyfnod cyffrous o newis yn hanes addoli yng Ngheredigion."

Mae'r pantomeim blynyddol yn un o uchafbwyntiau'r flwyddyn yng nghalendr y theatr gyda dros 30 o wirfoddolwyr yn cyfrannu at hwyl y cynhyrchiad fel cast neu griw technegol a llwyfan.

Bydd criw hwyliog Dyffryn Aeron yn cwrdd â Iolo Morgannwg ar lwyfan Theatr Felin-fach rhwng y 5 a'r 12 o Ragfyr.