ပါကစ္စတန်က ကားနဲ့ရထားတိုက်မှုမှာ ဆစ်ခ်ဘုရားဖူး ၂၀ ကျော် သေဆုံး
ဓာတ်ပုံ ရင်းမြစ်, AFP
ပါကစ္စတန်အရှေ့မြောက်ပိုင်းမှာ ဆစ်ခ်ဘာသာဝင် ဘုရားဖူးတွေကို တင်ဆောင်လာတဲ့ ဗန်ကားတစီးကို ရထားတစင်းက တိုက်မိခဲ့တဲ့အတွက် ကားထဲမှာပါလာတဲ့ ဆစ်ခ်ဘုရားဖူး ၂၁ ယောက်ထက်မနည်း သေဆုံးခဲ့ပြီး နောက်ထပ် ၁၀ ဦးလည်း ဒဏ်ရာရခဲ့ပါတယ်။
ပန်ဂျပ်ပြည်နယ်အတွင်းက ရှိတ်ခူးပူရ ဒေသအနီးမှာရှိတဲ့ ကားလမ်းနဲ့ ရထားလမ်းဆုံတနေရာမှာ အခုလို ဖြစ်ခဲ့တာ ဖြစ်ပြီး တိုက်မိတဲ့ရထားကတော့ ကရာချိနဲ့ လာဟိုးမြို့အကြား ပြေးဆွဲတဲ့ အမြန်ရထားဖြစ်ပါတယ်။
ဇွန်လ ၃ ရက်နေ့က ဖြစ်ခဲ့တဲ့ အဲဒီရထားတိုက်မှုမှာ သေဆုံးသူ အများစုဟာ တမိသားစုတည်းက ဖြစ်ပြီး ဆစ်ခ်ဘာသာဝင်တွေရဲ့ အဓိကကျတဲ့ အထွတ်အမြတ်နေရာတခုဖြစ်တဲ့ နန်ကာနာဒေသက ဆစ်ခ်ဘုရားကျောင်းက အပြန်မှာ အခုလို ဖြစ်ခဲ့တာ ဖြစ်ပါတယ်။
ရထားပေါ်ပါလာသူတွေထဲကတော့ ဒဏ်ရာရသူ မရှိဘူးလို့ဆိုပါတယ်။
ပါကစ္စတန်ရထားလမ်းတွေမှာ လတ်တလော အခုလို လူသေစေတဲ့အထိ မတော်တဆ ဖြစ်မှုတွေ ဖြစ်ထားအပြီး အခုလို ထပ်ဖြစ်ခဲ့တာလည်း ဖြစ်ပါတယ်။
ပြီးခဲ့တဲ့နှစ် နိုဝင်ဘာလမှာ ကရာချိ-ရာဝယ်ပင်ဒီ ပြေးဆွဲတဲ့ ရထားမီးလောင်မှု ဖြစ်ပွားခဲ့ပြီး လူ ၇၀ ကျော်အထိ သေဆုံးထားတာ ဖြစ်ပါတယ်။
အဲဒါဟာ ၂၀၁၉ ခုနှစ်အတွင်း ရထားပြေးဆွဲမှုနဲ့ သက်ဆိုင်တဲ့ မတော်တဆဖြစ်မှု အခု ၁၀ဝ ကျော်ထဲက တခုသာ ဖြစ်ပါတယ်။
အခုလို ရထားအတိုက်ခံခဲ့ရတဲ့ ကားဟာ ရထားလာစဉ် ပိတ်ထားတဲ့ ဂိတ်မှာ မစောင့်ဘဲ ဖြတ်လမ်းကနေ ဖြတ်ကူးဖို့ ကြိုးစားရင်း အခုလို အတိုက်ခံခဲ့ရတာ ဖြစ်ပြီး ကားမောင်းသူလည်း သေဆုံးခဲ့တယ်လို့ အစိုးရ အရာရှိတွေက ပြောပါတယ်။
ရှိတ်ခူးပူရ အရုဏ်ဦး သတင်းစာကို ရဲတွေ အပြောအရတော့ ကားပေါ်မှာ လူ ၂၅-၂၆ ယောက်လောက် ပါလာပြီး သေဆုံးသူတွေအထဲမှာ အမျိုးသမီးတွေနဲ့ ကလေးတွေလည်း ပါဝင်တယ်လို့ ဆိုပါတယ်။
