ကွတ်ခိုင်မြို့တိုက်ပွဲ အရပ်သား ၅ ဦး သေဆုံးမှု တပ်မတော်ကပြန်ရှင်း

ကွတ်ခိုင်မြို့က အရပ်သား ၅ ဦး သေဆုံးပြီး၊ ၃ ဦး ဒဏ်ရာရရှိ ခဲ့တဲ့ ပစ်ခတ်မှုဟာ မြောက်ပိုင်း မဟာမိတ်အဖွဲ့တွေ ဘက်က ပစ်တာလို့ မြန်မာတပ်မတော်က စက်တင်ဘာလ ၃ရက် နေ့စွဲနဲ့ သတင်းထုတ်ပြန်ပါတယ် ။

တပ်မတော်က ရွာတွင်းကို လက်နက်ကြီးတွေနဲ့ ဝင်ပစ်လို့ အရပ်သား ရွာသူရွာသားတွေ သေဆုံးဒဏ်ရာရရှိတယ်လို့ ကွတ်ခိုင်မြို့နဲ့ နယ်မြေခံတပ်ဌာနချုပ်တွေကို လာပစ်တဲ့ လက်နက်ကိုင်အဖွဲ့တွေက သတင်းမှား ကောလာဟလ ထုတ်လွှင့်ခဲ့တာလို့လည်း တပ်ဘက်က ရှင်းပါတယ် ။

ကွတ်ခိုင်မြို့ရဲ့ အနောက်တောင်ဘက်ကနေ လက်နက်ကြီးတွေနဲ့ လာရောက် နှောင့်ယှက်ပစ်ခတ်တိုက်ခိုက်ခဲ့တာ ဖြစ်ပြီးတော့ အရပ်သားတွေသေဆုံးခဲ့တဲ့ မော်ဟစ်စုစည်းရွာဟာ ပန်ဆေးကျေးရွာအနီးကနေ ပစ်ခတ်တဲ့ ကျည်လမ်းကြောင်းနဲ့ မန်ထန်ရွာ ကချင် ဘုရားကျောင်းအနီးက ပစ်ခတ်တဲ့ ရန်သူ့ကျည်လမ်းကြောင်း ၂ ကြောင်း ပေါ်မှာ ကျရောက်နေတာကို စစ်ဆေးတွေ့ရှိရတယ်လို့လည်း တပ်မတော် ထုတ်ပြန်ချက်မှာ ပါပါတယ် ။

မြောက်ပိုင်း မဟာမိတ်အဖွဲ့ကတော့ အရပ်သား ၅ ဦးဟာ မြန်မာတပ်မတော်က ပစ်ခတ်မှုကြောင့် သေဆုံးခဲ့တာဖြစ်ပြီးတော့ အဲဒီအတွက် အထူးဝမ်းနည်းကြောင်း စက်တင်ဘာလ ၁ ရက်နေ့ က သတင်းထုတ်ပြန်ပါတယ်။

လူမှုကွန်ရက် စာမျက်နှာတွေမှာ ပထမဦးဆုံးတင်ခဲ့တဲ့ ဗုံးသီးဒလက်ပိုင်း ဓာတ်ပုံ အထောက်အထားဟာ အမှတ်အသားစာ တစ်စုံတစ်ရာ မပါပေမယ့် နောက်ပိုင်း တင်တဲ့ ဓာတ်ပုံတွေမှာ တပ်မတော်က ထုတ်တဲ့ ဗုံးသီးပုံသဏ္ဍာန် အမှတ်အသားပါ ဓာတ်ပုံတွေကို လုပ်ကြံဖန်တီး သတင်းအမှား ဖော်ပြတာလို့လည်း ထုတ်ပြန်ချက်မှာ ပြန်ရှင်းပါတယ်။

မြောက်ပိုင်းမဟာမိတ် အဖွဲ့ကတော့ ဒီပစ်ခတ်မှုဟာ ကွတ်ခိုင်အခြေစိုက် ခမရ ၂၄၁ က ပစ်တာဖြစ်ပြီးတော့ ၁၂၂ မမ လက်နက်ကြီးကျည် ၃ လုံးပစ်တာဖြစ်တယ်လို့ သြဂုတ်လ ၃၁ ရက်နေ့က ပြောပါတယ်။

တပ်မတော်ဘက်ကတော့ ဒီပစ်ခတ်မှုနဲ့ပက်သက်ပြီး အသေးစိတ် စုံစမ်းစစ်ဆေးမှုတွေကို ဆက်လက်ပြုလုပ်လျက် ရှိတယ်လို့လည်း ပြောပါတယ်။

ရှမ်းပြည်နယ်၊ ကွတ်ခိုင်မြို့မှာ သြဂုတ် ၃၁ရက်နေ့ မနက်ပိုင်းက မြန်မာ့တပ်မတော်နဲ့ မြောက်ပိုင်းမဟာမိတ် ၃ဖွဲ့အကြားဖြစ်ပွားခဲ့တဲ့ တိုက်ပွဲတွေကြောင့် မော်ဟိတ်စုစည်းကျေးရွာအတွင်း လက်နက်ကြီးကျလို့ တစ်နှစ်သားအရွယ် ကလေးငယ်နဲ့မိခင် အပါအဝင် လူ ၅ ဦး သေဆုံးသွားခဲ့ပါတယ်။

' ' ဒဏ်ရာ ရတဲ့ ၂ယောက်ကိုတော့ လားရှိုးဆေးရုံကို ပို့လိုက်ပြီ။ ဆုံးသွားတာတော့ ၅ဦးပါ။ လသား ကလေးငယ်တစ်ယောက်ရယ် မိခင်ရယ်၊ နောက်ထပ် ၈ နှစ်အရွယ် ကလေး တစ်ယောက် လည်း ပါတယ်။''လို့ အခင်းဖြစ်ရာကို သွားရောက်ကူညီခဲ့တဲ့ ဗြဟ္မစိုရ်နှလုံးသား လူမှုကူညီရေးအသင်းက အဖွဲ့ဝင် တစ်ဦးက ဘီဘီစီကိုပြောပါတယ်။

သြဂုတ်လ ၃၁ ရက် မနက် အစောပိုင်းကတည်းက ကွတ်ခိုင်မြို့ပေါ်ရပ်ကွက်တွေမှာပါ ပစ်ခတ်မှုတွေဖြစ်ခဲ့ပြီး မြို့ပေါ် ရပ်ကွက်တစ်ခုဖြစ်တဲ့ ရပ်ကွက် ၈ မှာပါ တိုက်ပွဲတွေဖြစ်ခဲ့တဲ့အတွက် အဲဒီရပ်ကွက်မှာရှိတဲ့ မသန်စွမ်း ကျောင်းက ကလေးငယ်တွေကို ဘေးလွတ်ရာ တိမ်းရှောင်နေကြရတယ်လို့ ကျောင်း တာဝန်ခံ ဒေါ်မိုင်းမိုင်းက ဘီဘီစီကိုပြောပါတယ်။

ရှမ်းမြောက်မှာ ဖြစ်ပွားနေတဲ့ တိုက်ပွဲတွေဟာ သြဂုတ်လ ၁၅ ရက်နေ့က စတင်ခဲ့တာ ဖြစ်ပြီး လားရှိုး-မူဆယ် လမ်းပိုင်းမှာ သြဂုတ်လ ၂၉ ရက်နဲ့ ၃၀ ရက် နှစ်ရက်ဆက်တိုက် အရပ်ဘက် ကုန်ကားနဲ့ ခရီးသည် ကား ၆ စီး မီးရှို့ခံထားရပြီး လမ်းပန်းဆက်သွယ်ရေး ပြတ်တောက်ခဲ့ပါတယ်။

ကွတ်ခိုင်-မူဆယ်လမ်းပိုင်း စက်တင်ဘာလ ၃ ရက်နေ့မှာ ပြန်ပွင့်ပေမယ် မူဆယ်တက်မယ့် ကားဆရာတွေဟာ လမ်းမှာ မီးလောင်ထားတဲ့ကားတွေ လမ်းထောင့်တွေမှာ ရှိတာ သတိထားဖို့လိုတယ်လို့လည်း ဒေသခံတစ်ဦး ကပြောပါတယ်။