နိုင်ငံကူးလက်မှတ်ရုံးတွေ ရက်ပိုင်းအတွင်း ဖွင့်ဖို့ရှိ

ပြီးခဲ့တဲ့ ဇန်နဝါရီလလဆန်းကစလို့ ပိတ်ထားခဲ့တဲ့ နိုင်ငံကူးလက်မှတ်ထုတ်ပေးရေးရုံးတွေကို ဒီရက်ပိုင်းအတွင်း ပြန်ဖွင့်တော့မယ်လို့ စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဘီဘီစီကိုပြောပါတယ်။

ဖွင့်မယ့်ရက် အတိအကျကို သူကပြောဆိုတာမရှိပေမယ့် နိုင်ငံကူးလက်မှတ်ထုတ်ပေးရေးရုံးနဲ့ နီးစပ်သူတွေကတော့ လာမယ့် ဖေဖော်ဝါရီလ ၂၄ ရက်နေ့ဖြစ်နိုင်တယ်လို့ ပြောဆိုပါတယ်။

ပြီးခဲ့တဲ့ ဇန်နဝါရီလ ၂ ရက်နေ့က ရန်ကုန်မြို့ ဗဟန်းမြို့နယ် စက်မှု ၁ လမ်းမကြီးမှာ ရှိတဲ့နိုင်ငံကူးလက်မှတ်ထုတ်ပေးရေးရုံးမှာ System အဆင့်မြှင့်မှာဖြစ်လို့ ရုံးကိုခေတ္တပိတ်ထားမယ်လို့ ရုံးရှေ့မှာ ဗီနိုင်းထောင် ကြေညာထားခဲ့ပါတယ်။

ဒါကြောင့် ပြည်ပကို အရေးပေါ်ထွက်ခွာဖို့ ရှိတဲ့ ကျောင်းသားတွေ ကျန်းမာရေးကုသမှုခံယူသူတွေ အပါအဝင် သက်တမ်းတိုးဖို့ရှိသူတွေပါ အခက်တွေ့ခဲ့ကြပါတယ်။

အဲဒီရက်က စပြီး ရန်ကုန်မြို့ အပါအဝင် မြန်မာနိုင်ငံ အနှံ့က ရုံးတွေကို ပိတ်ထားခဲ့သလို ပြည်ပနိုင်ငံတွေက သံရုံးတွေမှာ နိုင်ငံကူးလက်မှတ် သက်တမ်းတိုးတာတွေကို လည်း ရပ်ထားခဲ့တယ်လို့ ပြည်ပရောက်မြန်မာနိုင်ငံသားတွေက ပြောပါတယ်။

စစ်အာဏာသိမ်းပြီးနောက် ပြည်တွင်းမှာ အလုပ်အကိုင် အခွင့်အလမ်း နည်းပါးလာပြီး ၊ စီးပွားရေးအခက်အခဲများကြုံတွေ့လာရတဲ့ အတွက် အိမ်နီးချင်းနိုင်ငံတွေကို သွားရောက်အလုပ်လုပ်ကိုင်သူတွေရှိသလို အိမ်နီးချင်းနိုင်ငံတွေမှာ ပညာ ဆက်လက် သင်ယူလိုတဲ့ ကျောင်းသားလူငယ်တွေကလည်း အချိန်မီ နိုင်ငံရပ်ခြားသို့ထွက်ခွာနိုင်ဖို့အတွက် နိုင်ငံကူးလက်မှတ်စာအုပ် ကိုင်ဆောင်ထားရေးအတွက် ကြိုးစားနေကြတာ ဖြစ်ပါတယ်။

အာဏာသိမ်းမှုမဖြစ်ခင်က ဝန်ဆောင်ခငွေကျပ် လေးသောင်းနီးပါးသာ ကျသင့်ခဲ့တဲ့ နိုင်ငံကူးလက်မှတ် ပြုလုပ်နိုင်တဲ့အခြေအနေဟာ အာဏာသိမ်းပြီးနောက်မှာ QR Code ရယူရတဲ့ စနစ်ကို ပြောင်းလဲခဲ့ပြီးအကန့်အသတ်တွေကြောင့် နိုင်ငံကူးလက်မှတ်ရဖို့ ငွေကျပ် လေးသိန်းကနေငါးသိန်း နီးပါးအထိ ကုန်ကျခဲ့တယ်လို့ နိုင်ငံကူးလက်မှတ် ပြုလုပ်ခဲ့သူတွေက ဘီဘီစီကို ပြောပါတယ်။

နိုင်ငံကူးလက်မှတ်ရုံးပိတ်လို့ လူတွေ အခက်တွေ့နေ