ကမ္ဘာ့ အကြီးဆုံး စက်ဝတ်စုံ သို့မဟုတ် Prosthesis
ဓာတ်ပုံ ရင်းမြစ်, Reuters
ဒီဧရာမ စက်ရုပ် ကြီးဟာ ကမ္ဘ့ာ အကြီးဆုံး အိတ်ဆိုစကယ်လီတန်ခေါ်တဲ့ ခန္ဒာပြင်ပ အရိုးဘောင်တခုလို သုံးနိုင်ပြီး ခြေ ၄ ချောင်းထောက်ပြီး သွားလာနိုင်တာဖြစ်ပါတယ်။
Prosthesis လို့ အမည်ပေးထားတဲ့ ဒီစက်ရုပ်ကြီးဟာ စက်ဝတ်စုံတခုအဖြစ်လည်း သုံးနိုင်ပါတယ်။ ကနေဒါ နိုင်ငံက အနုပညာရှင်နဲ့ အင်ဂျင်နီယာ တဦးဖြစ်သူ Jonathan Tippett က နှစ်ပေါင်းများစွာ အချိန်ယူပြီး တီထွင် ဖန်တီးထားတာ ဖြစ်ပါတယ်။ အမြင့် ၃ မီတာကျော်ပြီး အလေးချိန် ကီလိုဂရမ် ၄၀၀၀ ရှိပါတယ်။ မြင်းကောင်ရေ ၂၀၀ အားရုန်းနိုင်ပြီး ဒါဟာ သာမန်ကားတစင်းရဲ့ ရုန်းအားထက် ပိုပါတယ်။
နောက်ပြီး လူတယောက် စွမ်းဆောင်နိုင်တဲ့ ခွန်အားပမာဏကို အဆ ၅၀ မြှင့်တင်ပေးနိုင်ပါတယ်။
ဓာတ်ပုံ ရင်းမြစ်, Reuters
Jonathan ဒီလို စက်ရုပ်ကြီးကို တီထွင်ဖို့ ဖြစ်လာတာက သူ ငယ်စဉ်က ကြည့်ခဲ့ဖူးတဲ့ Transformers films ရုပ်ရှင်တွေက စခဲ့တာ ဖြစ်ပါတယ်။ ဒါပေမယ့် လွန်ခဲ့တဲ့ ၇ နှစ်က သူ့မိတ်ဆွေ အင်ဂျင်နီယာတွေနဲ့ ပြောဆို ဆွေးနွေးပြီးမှသာ စတင် တီထွင်ဖြစ်ခဲ့တာ ဖြစ်ပါတယ်။ သူ့စက်ရုပ်ဟာ မြေတူးစက်၊ မြေသယ်ကားနဲ့ ဒိုင်နိုဆောတွေ ပေါင်းထားတာ ဖြစ်တယ်လို့ Jonathan က ပြောပါတယ်။
စက်ရုပ်ကို ဝတ်စုံလို ကောင်းကောင်း အသုံးချတတ်ဖို့ မိနစ်အနည်းငယ်ပဲ လိုတယ်လို့ Jonathan က ပြောပါတယ်။ မိနစ်ပိုင်း အတွင်းမှာတင် ဒီစက်ရုပ်ကြီးထဲ ဝင်ရပ်ပြီး လိုရာကို မောင်းနှင်နိုင်ပါပြီ။ ဟန်ချက်ညီအောင် ထိန်းပြီး အတက်အဆင်း အတိမ်းအစောင်းတွေ လုပ်လို့ ရပါတယ်။
ဒီလို စက်ရုပ်ကြီးကို ထိန်းချုပ် မောင်းနှင်ရတာဟာ ဘာနဲ့မှ မတူဘဲ တမူထူးခြားတယ်၊ ပျော်စရာကောင်းသလို ထိတ်လန့်စရာကောင်းတဲ့ အခါတွေလည်း ရှိတယ်လို့ Jonathan က ပြောပါတယ်။
ဓာတ်ပုံ ရင်းမြစ်, Reuters
ဒီ ၁၀ ပေမြင့်တဲ့ စက်ရုပ်ထဲကို တက်ပြီးအထဲမှာ ဝင်ထိုင် ပြီးရင်တော့ စက်နှိုးရတာပေါ့၊ မဟုတ်ရင် ဘယ်လို လှုပ်ရှားနိုင်မလဲလို့ Jonathan က ပြောပါတယ်။
လွန်ခဲ့တဲ့ ၂ နှစ်က သူ့ရဲ့ ဒီ စက်ရုပ်ဝတ်စုံကြီး ဂင်းနက်စ် ကမ္ဘာ့စံချိန် မှတ်တမ်းများ စာအုပ်ထဲမှာ ကမ္ဘာ့အကြီးဆုံး ၄ ချောင်းထောက် စက်ရုပ်ဝတ်စုံကြီးအဖြစ် မှတ်တမ်းတင်ခဲ့ပါတယ်။
Jonathan က နောက်ထပ် စက်ရုပ်ဝတ်စုံကြီးတွေ ထပ်ပြီး ဖန်တီးဖို့ စီစဉ်နေပါတယ်။ အနာဂတ်မှာ ဒီလို စက်ရုပ်ဝတ်စုံတွေကို အပျော်သဘောမကဘဲ သတ္တုတူးဖော်ရေး၊ စိုက်ပျိုးရေးနဲ့ ရှာဖွေ ကယ်ဆယ်ရေး လုပ်ငန်းတွေမှာပါ အသုံးပြုလာကြတာ မြင်ချင်တဲ့အကြောင်း Jonathan က ပြောပါတယ်။
