Mòr-chaochladh a' Ghnìomhachais

Thòisich Mòr-chaochladh a' Ghnìomhachais mu 1760. Dh'adhbhraich e cuid dhe na h-atharraichean bu mhotha ann an linn Bhictòria.

B' e àm san tàinig atharrachadh mòr air gnìomhachas, teicneòlas agus saidheans a bh' ann am Mòr-chaochladh a' Ghnìomhachais:

Lùth

• An àite a bhith a' cleachdadh dhaoine no beathaichean, thòisich cuid a ghnìomhachasan a' cleachdadh uisge agus gaoth mar bhunan airson lùth.
• Thòisich daoine a' cleachdadh gual mar chonnadh an àite fiodh no mòine. Bha gual a' cur a-mach barrachd teas agus ghabhadh iarann agus stàilinn na b' fheàrr a dhèanamh.
• Bha gual cuideachd air a chleachdadh airson smùid a dhèanamh dhan einnsean-smùide a bha air tighinn às ùr.
• Bha ola agus gas nàdarra air an cleachdadh airson teas agus solas.

Teicneòlas

• Chaidh innealan ùra innleachadh a dhèanadh an obair nas luaithe agus air sgèile nas motha na dhèanadh daoine len làmhan.
• Bha an t-inneal-snìomh spinning jenny agus beairt-lùtha a' ciallachadh gun do dh'fhàs gnìomhachas an obair-fhighte.
• Bha an t-einnsean-smùide a' toirt barrachd lùtha dha na factaraidhean mòra.
• Bha an trèan-smùide agus an rèile a' ciallachadh gun robh siubhal na bu luaithe agus bha e na b' fhasa daoine, stuthan amh agus bathar a ghiùlan.

Obair

• Mus tàinig Mòr-chaochladh a' Ghnìomhachais biodh luchd-ciùirde a' dèanamh rudan nan dachaighean no ann am bùithtean-obrach bheaga. Le siostam ùr nam factaraidhean bha aig daoine ri dhol gu àite-obrach far am biodh iad ag obair airson sioft.

• An àite rud a dhèanamh bho cheann-gu-ceann, bhiodh luchd-obrach nam factaraidhean ag obrachadh innealan sònraichte fa leth aig diofar ìrean dhen phròiseas dèanaimh.

Còmhdhail

• Bha factaraidhean agus gnìomhachasan a' cur feum air barrachd stuthan amh agus bha iad a' dèanamh barrachd bathair. Bha iad sin uile rin giùlan air còmhdhail.
• Cha robh còmhdhail le eich luath gu leòr agus bha cus stuth ri ghiùlan.
• Chaidh canàlan a dhèanamh airson dèiligeadh ris a' chùis seo. B' urrainn bàtaichean tòrr bathair a ghluasad air canàlan.
• Chaidh rathaidean a leasachadh, gu h-àraidh nuair a nochd uachdaran le macadam a bha na bu làidire agus na bu rèidhe.
• Na b' fhaide air adhart, nuair a thòisich an trèan-smùide agus an rèile, bha siubhal agus còmhdhail gu math luath agus earbsach agus na b' fheàrr airson luchdan troma a ghiùlan.

Einnseanaireachd

• Thàinig einnseanaireachd air adhart air sgàth stuthan ùra agus tuigse nas fheàrr air saidheans.
• Bha e a-nis air chomas togalaichean cloiche nas làidire a thogail leithid Taigh-solais Creag a' Chluig, agus drochaidean mòra concrait mar Drochaid-rèile Ghleann Fhionnainn, structairean iarainn is stàilinn mar Drochaid Thatha agus Drochaid-rèile Fhoirthe.
• Cha bhiodh pròiseactan mòra ann an einnseanaireachd chatharra mar an Canàl Cailleannach agus sgeama Loch Ceiteirein, a tha a' toirt uisge òil do Ghlaschu, air tachairt mura b' e Mòr-chaochladh a' Ghnìomhachais.