Defnyddio iaith - treigladauArddodiaid sy'n achosi treigladau meddal

Cofia fod treiglad meddal yn dilyn yr arddodiaid hyn:

• am, ar, at, gan, dros, drwy, wrth, dan, heb, hyd, i, o

Dyma enghreifftiau o frawddegau sydd â mwy nag un treiglad meddal ynddynt:

• Es i i'r gwely am ddeg o'r gloch neithiwr gan obeithio cael noson o gwsg.
• Dw i ar bigau'r drain i wybod canlyniad yr arholiad.
• Danfonais i ebost at gyfaill yn sôn am lyfr gwych.

Mae treiglad meddal hefyd yn dilyn 'ei' gwrywaidd. Er enghraifft: Cafodd y dyn ei gyhuddo ar gam.

Ond treiglad llaes sy'n dilyn 'ei' benywaidd: Cafodd y wraig ei chyhuddo ar gam.

Cofia hefyd fod gair benywaidd, ee 'cath' yn treiglo'n feddal ar ôl y fannod 'y':

• y gath
• yr ardd
• y faneg
• y fenyw
• y ddafad

Ond nid yw ll a rh yn treiglo'n feddal ar ôl y fannod mewn enw benywaidd unigol, ee 'y llyfrgell', 'y rhaw'.

Ac nid yw gair gwrywaidd, ee 'ci' yn treiglo'n feddal ar ôl y fannod 'y': y ci, y dyn, y mwnci, y bwrdd.

Cofia nad yw geiriau lluosog yn treiglo ar ôl y fannod 'y' chwaith: y cariadon, y papurau, y gwragedd.