Chwedl Branwen ferch Llŷr

Cynnwys y wers hon

• Un fideo yn adrodd chwedl Branwen ferch Llŷr
• Dau weithgaredd i ymgyfarwyddo gyda’r chwedl

Lesson content

• One video retelling the tale of Branwen ferch Llŷr
• Two activities to familiarise you with the story

Fideo / Video

Chwedl Branwen ferch Llŷr yw ail stori Pedair Cainc y Mabinogi. Mae’r stori’n digwydd yng Nghymru ac Iwerddon.

Gwylia’r fideo yma sy’n adrodd y stori.

Gweithgaredd 1 / Activity 1

Creu poster

Mae pair y dadeni’n chwarae rhan bwysig yn y chwedl.

Cer ati i greu poster yn ymffrostio am allu’r pair ac yn gwahodd pobl i ddod i’w weld.

Cofia ddefnyddio iaith ac arddull bwrpasol i ddweud dy neges mewn ffordd gynnil a bachog:

• defnyddia deitl bachog a hiwmor, o bosib
• defnyddia eiriau pwrpasol
• defnyddia ferfau byrlymus ac addas, ee gelli di ddefnyddio ffurf orchmynnol y ferf:
  • Edrycha! (ffurf unigol/anffurfiol)
  • Edrychwch! (ffurf luosog/ffurfiol)
• cofia strwythuro’r poster yn ofalus – oes dilyniant llyfn, ac ydy'r drefn yn gwneud synnwyr?
• noda’r holl wybodaeth angenrheidiol, ee y lleoliad i bobl ddod i’w weld

Mae’n bwysig bod dy boster yn edrych yn drawiadol ac yn hawdd i’w ddarllen felly:

• defnyddia luniau syml
• defnyddia liw
• paid â llwytho’r poster gyda gormod o wybodaeth – dewisa’r wybodaeth angenrheidiol yn unig

Cyn mynd ati i lunio dy boster, edrycha ar hwn.

Sut allet ti wella ar y poster yma? Beth sydd ar goll a beth allai fod yn well?

Gweithgaredd 2 / Activity 2

Yn y chwedl, mae Branwen yn ysgrifennu llythyr i’w brawd, y cawr Bendigeidfran, yn sôn am ba mor anhapus mae hi a pha mor wael mae’n cael ei thrin.

Dychmyga mai ti yw Branwen.Ysgrifenna lythyr yn ymbil ar Bendigeidfran i ddod i dy achub.Cofia, mae Bendigeidfran yn frawd i ti felly ysgrifenna’r llythyr mewn iaith anffurfiol.

Os nad wyt ti’n siŵr sut mae ysgrifennu llythyr, clicia neu bwysa ar y linc yma.

Dyma rai syniadau:

• Medri di ddefnyddio ebychnodau i bwysleisio dy deimladau yn y llythyr. Cofia, mae gennyt ti deimladau cryf am dy sefyllfa di ar hyn o bryd!

• Beth am ddechrau yn syth gyda dy deimladau? Rwyt ti eisiau rhoi portread llawn o dy sefyllfa i dy frawd. Er enghraifft:

  • Dw i mor anhapus!
  • Dw i mor ddigalon!

• Beth am ddechrau gyda chwestiwn, gan fod y llythyr yn gofyn am gyngor? Er enghraifft:

  • Be wnâi?
  • Sut dw i’n dianc o’r sefyllfa yma?

• Beth am ddechrau’n syth gyda’r naratif? Rwyt ti eisiau rhannu dy sefyllfa’n syth. Er enghraifft:

  • Mae Matholwch wedi fy nghosbi ar gam!
  • Dw i wedi fy ngharcharu yn y gegin!

Nodiadau i rieni

Ar ôl gorffen y wers, bydd disgyblion yn gallu:

• adrodd chwedl Branwen ferch Llŷr yn hyderus

Notes for parents

After completing the lesson, students will be able to:

• retell the tale of Branwen Ferch Llŷr with confidence