Ermənistan: baş nazir seçkiləri ərəfəsində Serj Tankian Yerevana gəlib
Şəklin mənbəyi, Getty Images
Amerikanın System Of A Down rok qrupunun solisti Serj Tankian etiraz hərəkatının lideri Nikol Paşinyanı baş nazir seçkilərində dəstəkləmək üçün bazar ertəsi axşam Yerevana gəlib.
Bundan əvvəl Ermənistan baş naziri Serj Sarkisyanın istefasına nail olmuş etiraz hərəkatının lideri, "Yelk" (Çıxış) parlament fraksiyasının rəhbəri Nikol Paşinyan sakinləri Yerevanın Respublika meydanında toplaşmağa çağırıb.
O, tərəfdarlarını meydanda tanınmış System of a Down rok qrupunun solisti Serj Tankianı qarşılamağa çağırıb, Paşinyan öz Facebook səhifəsində dərc etdiyi video müraciətində bildirir.
Serj Tankian Ermənistanda Nikol Paşinyanın rəhbərlik etdiyi etiraz hərəkatını dəstəkləyən çoxsaylı xarici erməni diasporu nümayəndələrindəndir.
Nikol Paşinyanın bəyanatında bildirilir ki, o, Tankianı aeroportda qarşılayacaq və birlikdə Respublika meydanına gedəcəklər.
"Saat 21-də biz Respublika meydanında olarıq, qısa nitqlə çıxış edib, sabah görəcəyimiz işlər haqqında danışarıq", o deyib.
"Aeroportda Tankianı qarşılamaq istəyən varsa, gəlin, birlikdə gözəl bir qarşılama mərasimi təşkil edək", - Paşinyan əlavə edib.
Respublika meydanında ardıcıl keçirilən mitinqlər Ermənistan Milli Məclisində çoxluq təşkil edən Respublikaçılar Partiyasının (ERP) mayın 8-də baş nazir seçkilərində etiraz hərəkatı liderinin qələbəsini təmin etmək vədindən sonra dayandırılıb.
Məşhur rok ifaçı son vaxtlar Ermənistanda baş verən daxili siyasi hadisələrlə bağlı müntəzəm olaraq müraciətlərlə çıxış edib, "xalq hərəkatını" alqışlayırdı.
Son müraciətlərindən birində Tankian tezliklə Ermənistana gəlmək fikrində olduğunu demişdi.
Serj Tankian son dəfə 2015-ci ildə System of a Down qrupu ilə Yerevanın Respublika meydanında konsert vermişdi.
Mayın 8-də Ermənistan Parlamenti yenidən müxalifət lideri Nikol Paşinyanın baş nazir vəzifəsinə namizədliyini müzakirə etməlidir.
Ötən həftə Ermənistan parlamentində çoxluq təşkil edən hələ ki hakim Respublikaçılar fraksiyası etiraz hərəkatı liderinin seçilməsinə maneə olub.
