Kepler teleskopu Yer ölçüsündə olan 100 planet aşkar edib
Şəklin mənbəyi, nasa
Nasa ABŞ Kosmik agentliyinin Kepler teleskopu uzaq ulduzlar ətrafında dövr edən Yer kürəsinə yaxın ölçülü 100-dən çox planet aşkar edib.
Teleskop eləcə də şəraiti suyun və demək həyatın mövcudluğu üçün yararlı sayılan zonalarda 9 kiçik ölçülü planetin olmasını müəyyən edib.
Tapıntılar Kepler teleskopu ilə kəşf olunmuş 1284 yeni planetlər kataloquna daxil edilib.
Nasa-nın bildirdiyinə görə bu, Günəş sistemi xaricində mövcud olan ekzoplanetlərin bir dəfəyə ən çox sayda aşkar edilməsi deməkdir.
Bundan əvvəlki kataloqda kəşf edilmiş planetlərin sayı təxminən 2 dəfə az olub.
Nasa ekspertləri Kepler teleskopu vasitəsilə əldə olunmuş yeni elmi nəticələri çərşənbə axşamı təşkil edilmiş tele-konfrans zamanı müzakirə ediblər.
Kepler teleskopu vasitəsilə uzaq ulduzlar barədə əldə olunan elmi məlumat astronomlara Yer planetinə bənzər obyektləri daha dərindən öyrənməyə imkan verir.
Nasa-nın Kepler teleskopu layihəsinin elmi qrupuna daxil olan Dr Natalie Batalha bildirib ki, hesablamalara görə kainatda 10 milyarda yaxın planetin mühiti həyat üçün yararlı ola bilər.
