Roma Papası ənənəvi bazar günü messasına niyə gecikdi?

Roma Papası Francis Vatikanda liftdə ilişib qalaraq hər həftənin bazar günü keçirilən messaya yubanıb.

O buna görə onun dualarını dinləməyə gələnlərdən üzr istəyib.

82 yaşlı Papa Francis elektrik kəsintisinə görə 25 dəqiqə liftdə qalıb.

Onu bu vəziyyətdən yanğınsöndürənlər xilas ediblər.

"Yubandığıma görə üzr istəməliyəm", - gülümsəyən Roma Papası duasına başlamazdan əvvəl deyib.

Daha sonra pontifik camaatdan yanğınsöndürənləri alqışlamağı xahiş edib.

Papa Francis-in sözlərinə görə, liftin dayanmasına "elektrik gərginliyinin azalması" səbəb olub.

"Nə yaxşı ki, yanğınsöndürənlər özlərini çatdırdı. Mən onlara təşəkkür edirəm, onlar 25 dəqiqəyə lifti yenidən işə sala bildilər", - pontifik deyib.

Papa Francis-in yubanması Roma Papasının bazar messasını canlı yayımda göstərən İtaliya televiziya kanallarını təşvişə salıb - onlar yubanmanın səbəbinin pontifikin səhhətiylə bağlı ola bilməsindən şübhələnib, AFP xəbər agentliyi qeyd edib.