Ethiopian Airlines: "Boeing 737 qəzasından sağ çıxan olmayıb"
Şəklin mənbəyi, Ethiopian Airlines
Ethiopian Airlines şirkətinə məxsus sərnişin təyyarəsi Əddis-Əbəbədən qalxdıqdan qısa müddət sonra qəzaya uğrayıb, nəticədə təyarədə olanların hamısı ölüb, hava yolları şirkəti bildirib.
Şirkətin yaydığı məlumata əsasən, ET302 reysilə Efiopiya paytaxtı Əddis-Əbəbədən Keniya paytaxtı Nayrobi şəhərinə uçan Boeing 737 Max-8 sərnişin təyyarəsinin göyərtəsində 149 sərnişin və 8 nəfər uçuş heyətinin üzvü olub.
Ethiopian Airlines şirkətinin bildirdiyinə görə, təyyarədə 33 ölkənin vətəndaşları olub.
Onların arasında 32 Keniya, 18 Kanada, 8 ABŞ və 7 Britaniya vətəndaşının olduğu qeyd edilir. Bu arada Rusiyanın RIA Novosti agentliyi təyyarədə sərnişinlər arasında 3 Rusiya vətəndaşının da olduğunu bildirib.
Qəza yerli vaxtla səhər saat 08:44-də baş verib, bir neçə ay yaşı olan Boeing 737 Max-8 təyyarəsi havaya qalxdıqdan cəmi 6 dəqiqə sonra.
Qəzanın səbəbi hələlik müəyyən olunmayıb.
Şahidlərdən biri BBC-yə bildirib ki, təyyarə yerə dəyən kimi güclü yanğın baş verib.
"Hər şey yanıb. Hadisə yerinə indi dörd helikopter var", - şahid qeyd edib.
Efiopiyanın Baş naziri Abiy Ahmed təyyarə qəzası ilə bağlı Twitter səhifəsində başsağlığı bildirib.
Şəklin mənbəyi, Jonathan Druion
Ethiopian Airlines şirkəti paytaxtdan 60 km cənub-şərqdə yerləşən Bishoftu şəhəri yaxınlığında axtarış-xilasetmə işlərinin aparıldığını bildirib.
Təyyarədə olan sərnişinlərin kimliyi barədə ilk məlumatı Çin dövlət mediası yayıb. Xəbərlərdə deyilib ki, təyyarədəki sərnişinlərdən səkkizi Çin vətəndaşı olub.
