Oskar mükafatı: Ən yaxşı film "Moonlight"dır
Şəklin mənbəyi, Getty Images
Amerikanın "Oskar" Kinematoqrafiya Sənəti Akademiyasının "ən yaxşı filmi" mükafatını Barry Jenkins-in "Moonlight" filmi alıb.
Hərçənd ki dəqiqələr öncə bu nominasiyada "La-La Land" musiqili filmi səhvən elan edilmişdi.
Mükafatı təqdim edən Warren Beatty izah edib ki, ona səhv məktubu veriblər.
Elandan sonra səhnəyə çıxan "La-La Land" filminin çəkiliş qrupu təşəkkür nitqinə başlayıb. Prodüserlərdən biri onları saxlayıb və bildirib ki, əslində "Moonlight" qalib gəlib.
"Moonlight"-ın qalib gəlmə anını izləyin. Moonlight filmi Miami-nin kasıb rayonlarında yeniyetmənin böyüməsini canlandırır.
Şəklin mənbəyi, Getty Images
"La-La Land" filmi isə başqa nominasiyalarda 6 dəfə qalib olub. Belə ki, baş rol ifaçısı Emma Stone "ilin ən yaxşı aktrisası" mükafatına layiq görülüb.
Şəklin mənbəyi, Reuters
Filmin rejissoru Damien Chazelle "ən yaxşı rejissor işi"nə görə "Oskar"ı qazanıb.
"Bu sevgi haqqında film idi və mən onu hazırlayarkən sevgiyə düçar olduğuma görə xoşbəxt idim", o mükafatı alarkən bildirib.
Chazelle bu mükafatı alan ən gənc rejissorlardan biridir.
Şəklin mənbəyi, Getty Images
"Dəniz sahilində Manchester" filmində oynamış aktyor Casey Affleck "ilin ən yaxşı aktyoru" olub. Bu ada "La-La Land"da baş rolu ifa vermiş Ryan Gosling də namizəd idi.
"La-La Land" əvvəldən bu mükafatın favoriti sayılırdı. Musiqili film 14 nominasiya üzrə namizəd olsa da, onlardan bir qismini uduzub. Bu film mahnı və musiqilərinə, eləcə də operator işinə görə də iki mükafat alıb.
