Bakıda, məktəbdə silahlı hadisə: müəllim xəsarət alıb

Fevralın 6-da Bakıda yerləşən İdrak liseyində şagird tərəfindən odlu silahdan açılan atəş nəticəsində müəllim yaralanıb.

Müəllim xəstəxanaya yerləşdirilib.

TƏBİB-dən fevralın 7-də BBC News Azərbaycancaya bildirilib ki, müəllimin vəziyyəti hazırda "stabildir və reanimasiya şöbəsindən neyrocərrahiyyə şöbəsinə köçürülüb".

"Hazırda müalicəsi palata şəraitində davam etdirilir", qurum bildirib.

Daxili İşlər Nazirliyi bildirib ki, hadisəni 10-cu sinif şagirdi törədib.

Şagirdin atasına məxsus ov silahı ilə məktəbə gələrək orada işləyən müəllimə xəsarət yetirdiyi deyilir.

Şagird saxlanıb. Ondan ov silahı götürülüb. - DİN-in yaydığı məlumatda deyilir.

Hadisənin səbəbləri hələ ki, məlum deyil.

Binəqədi rayon prokurorluğunda cinayət işi qaldırılıb.

Prokurorluq bildirib ki, hadisənin başvermə şəraiti və səbəbləri araşdırılır.