ፈረንሳይን ያስደነገጠው ዝርፊያ እንዴት ተፈጸመ?

ዘራፊዎቹ የፓሪሱን ሉቨር ሙዚየም ሰብረው የገቡት ፀሐይ በፓሪስ ሰማይ ላይ ወጥታ ጎብኚዎች ሙዚየሙን ለመጎብኘት መግባት ሲጀምሩ ነበር።

ዘራፊዎቹ በሙዚየሙ ውስጥ ከስምንት ደቂቃዎች በላይ ሳይቆዩ የፈረንሳይ ዋና ከተማ የፓሪስን ጎዳና በፍጥነት አቋርጠው ሲሄዱ አገሪቷ ያሏትን በጣም ውድ ቅርሶችን ይዘው ነበር።

ይህ በቅርብ ካጋጠሙ የዘራፋ ታሪኮች ውስጥ አንዱ የሆነው አስደንጋጩ ዘረፋ የተፈጸመበት መንገድ ታሪክ ነው።

በ03:30, ከአራቱ ዘራፊዎች ሁለቱ በመኪናው ላይ ያለውን መሰላል ተጠቅመው ድርብ መስኮት ወዳለው በረንዳ መወጣት ጀመሩ።

የመስታወት እና የእንጨት መስኮቶች ዘራፊዎቹ ለያዙት ዘመናዊ መቁረጫ አስቸጋሪ አልነበሩም። የፈረንሳይ ባለሥልጣናት እንዳረጋገጡትም የቅንጡው ቤተ መዘክር መስኮቶች በተገቢው ሁኔታ የተጠናከሩ አልነበሩም።

በ03:34 ዘራፊዎቹ ሙዚየሙ ውስጥ ነበሩ። ፊታቸውን የሸፈኑት ዘራፊዎች ከመቁረጫ መሳሪያቸው ጋር ጥሰው ሲገቡ የጦር መሳሪያ ያልታጠቁት የሙዚየሙ ጠባቂዎች ሸሹ።

በዚህ ጊዜ በዘራፊዎቹ እና በገንዘብ በማይተመኑት ውድ ቅርሶች መካከል የነበረው የተቀመጡበት የመስታወት ሳጥን ነበረ።

ቪዲዮው ከቤተ መዘክሩ ደቡብ ምዕራብ ክፍል ውስጥ የተቀረጸ መሆኑን የቢቢሲ መረጃ ማጣሪያ ለማረጋገጥ ችሏል።

በሙዚየሙ ውስጥ ያለው የደኅንነት ካሜራ ዘራፊዎቹ የፈጀባቸው ጊዜ ከሦስት ደቂቃ ከ57 ሰከንዶች ያልበለጠ መሆኑን እና በዚህ ጊዜ ውስጥም ውድ ጌጦችን ይዘው መሰወራቸውን አንድ የፈረንሳይ ሚኒስትር ተናግረዋል።

ዘራፊዎቹ ፈጣን እና በትክክል ምን ለማድረግ ወደ ሙዚየሙ እንደገቡ ቀድመው የሚያውቁ ናቸው።

የፈረንሣይ ዘውድ ጌጣጌጦች ከ1789 አብዮት በኋላ ሲጠበቁ የነበሩ ቅርሶች ናቸው። በስብስቦቹ ውስጥ ያሉት አብዛኞቹም ከ19 ኛው ክፍለ ዘመን የመጡ ሲሆን፣ በናፖሊዮን እና በወንድሙ ልጅ ናፖሊዮን ሳልሳዊ ንጉሣዊ ቤተሰቦች ጥቅም ላይ ይውሉ ነበር።

በአጠቃላይ ስምንት ውድ ጌጦች ተሰርቀዋል። የፈረንሣይ ባለሥልጣናት የተዘረፉትን ቅርሶች በዋጋ ሊተመኑ የማይችሉ ብለዋቸዋል። የከበሩ ድንጋዮች እና ውድ ማዕድናት ካላቸው የገንዘብ ዋጋ ባሻገር አንድ ሚኒስትር ቅርሶቹ 'በሃብት የማይተመን' የቅርስነት ዋጋ እንዳላቸው ገልጸዋል።