Шу ҳафтада жаҳон бўйлаб "чўчқа гриппи"га чалиниш ҳоллари тез суръатларда кўпайди.

Энг кўп ҳолларни қайд қилган мамлакатлар - Украина, Россия ва Хитой.

Марказий Осиёда Қирғизистон 11 та янги ҳолатни қайд қилган.

Қозоғистонда ҳам "чўчқа гриппи" ҳоллари хабар қилинган.

Жаҳон Соғликни сақлаш ташкилоти "чўчқа гриппи" глобал пандемияга айланган дейди.

У 210 мамлакатда қайд қилинган ва 39 мамлакатда одамлар ўлимига етаклаган.

Хасталикка чалиниш ҳоллари кескин ошар экан, барча ҳукуматлар олдинда турган қийинчиликларга ўзларини ҳозирлашга уринмоқдалар.

Энг кўп жабр чеккан жойлардан бири Украина.

У ерда грипп оқибатида нафас олиши қийинлашиб 60 киши вафот этиши ортидан Украина Соғликни сақлаш вазирлиги қудратли мамлакатлардан ёрдам сўраб мурожаат билан чиққан.

60 киши якшанба кунигача ўлгани айтилган бўлса, душанба куни бу кўрсаткич 67га чиққан, бироқ бу каби кескин сапчишга изоҳ берилмаган.

Украина расмийлари мактабларни ёпиш, оммавий йиғилишларни чеклаш ва тозалик чораларини кучайтириш бўйича амалиётларни йўлга қўйишни бошлашган.

Жаҳон Соғликни сақлаш ташкилоти саёҳат қилишга қарши чораларни қўллаб-қувватламайди, аммо Словакия Украина билан чегарасида икки нуқтани ёпиб қўйган.

Россия ҳам "чўчқа гриппи" ҳоллари тобора ошиб бораётганини маълум қилган, жами унга чалинган инсонлар сони 2000 мингга етган.

Қирғизистон ўзида ушбу грипп билан қайд қилинган кишиларнинг аксари поездда Москвадан сафар қилишганини айтган.

Хитой аввалига назоратни қўли остига олганини айтган бўлсада, охирги кунларда кескин ошган грипп ҳолларига қарши курашмоқда.

Хитой Соғликни сақлаш вазирлиги 5 минг одам чўчқа тумовини юқтирган ва етти киши вафот этганини билдирди.

Хитой ва бошқа бир неча мамлакатлар "чўчқа гриппи"ни юқтирган беморларни қаттиқ иҳоталаб қўйиш амалиётини қўллашган, аммо ҳозирда кўпроқ муолажага эътибор қаратишмоқда.

Туркия ўзининг катта шаҳарларида бир ҳафтадан ошиқ мактабларни ёпиб қўйиши ортидан, энди гриппга қарши вакциналарни беришни бошлаган.

350 мингга яқин тиббиёт ходимлари ҳамда Ҳаж зиёратига тайёрланаётган туркияликлар бошлаб эмланишни бошлаганлар.