Биргина Россиянинг ўзида чўчқа тумовини юқтирганлар сони қарийб 600 кишига етган

Россиялик масъулларнинг айтишларича, пойтахт Москвада чўчқа тумовини юқтирганлар сони бугунга келиб қарийб 600 кишига етган.

Масъуллар хасталик учоғи сифатида Москвадаги қатор олий ўқув юртларини тилга олишмоқда.

Бироқ расмий ҳисоб-китобларга кўра, беморларнинг ярмига яқинини болалар ташкил этишади.

Ноябр ойининг биринчи ярмида Москвага A/H1N1 вирусига қарши тайёр эмликнинг етиб келиши кутилмоқда.

Хасталик 5 кишининг умрига зомин бўлди

Кеча пайшанба куни Россияда чўчқа гриппидан қурбон бўлган инсонларнинг сони 5 га етганди. Сўнгги ўлим ҳолати Красноярск ўлкасида қайд этилган.

Бундан аввалроқ Читада уч, Москвада яна бир киши чўчқа тумови сабаб ҳаётдан кўз юмишганди.

Пайшанба куни кечқурун Россия Бош санитар врачи Геннадий Онишченко бутун мамлакат бўйлаб чўчқа гриппига йўлиққани аниқланган инсонларнинг сони 1896 тага етганини эълон қилди.

Жаноб Онишченко яна бир бор кексаю ёшни докали ниқоб тутиб юриш ва одам кўп бўладиган жойлардан четроқ юришга ундаган.

Россия Соғлиқни сақлаш вазирлиги аҳоли орасида ҳам хасталикдан огоҳлик кампаниясини бошлаш режасидадир.

Масъуллар фуқароларни "ўз бошларича даволанмаслик, чўчқа тумовига чалинган ҳолларида албатта шифокорга мурожаат этишлари лозим"ги билан огоҳлантиришмоқчи.

Вазирликка кўра, аҳолини мазкур хасталикка қарши эмлаш ишлари режаланганидан бир ой олдин, яъни 9 ноябр куни бошланади.

Меҳнат муҳожирлари ҳам хавф остида

Яшаш шароитлари ва тиббий хизматга имкониятлари назарга тутилганда, Россияда меҳнат қилаётган миллионлаб меҳнат муҳожирлари чўчқа тумовига чалиниши хавфи юқори бўлган гуруҳлардан бири сифатида кўрилади.

Норасмий ҳисоб-китобларга кўра, Россиядаги жами меҳнат муҳожирларининг сони 10-15 миллионтачани ташкил этади. Уларнинг бир миллионга яқини ўзбекистонликлардир.

Ўзбекистонлик меҳнат муҳожирларининг аксарияти эса, айнан Москвада яшаб, одамлар билан гавжум пойтахт бозорларида тирикчилик қилишади.

Маҳаллий кузатувчиларга кўра, Россиядаги меҳнат муҳожирларининг аксарияти тиббий суғуртага эга эмаслар. Ва шу сабабдан ҳам ҳар қандай хасталикка чалинган ҳолларида ўз ҳолларича даволанишга мажбурдирлар.

Уларнинг айтишларича, тиббий суғуртадан мосуво меҳнат муҳожирлари фақатгина пулли тиббий хизматга умид қилишлари мумкин. Лекин буни кўплаб меҳнат муҳожирларининг чўнтаклари кўтармайди.

Бошқа томондан, айнан молиявий қийинчиликлар сабаб, меҳнат муҳожирларининг бир хонада кўп кишилашиб туришлари хасталикнинг тез суръатларда тарқалиш хавфини янада кучайтиради.